Uqambe ingoma ngomethuli weZaziwa
UMCULI kamaskandi uMlindeni “Cevuzile” Mchunu uthi alusamphuthi uhlelo lwakuSABC 1, iZaziwa, ngenxa yokuzifela ngomethuli walo uPearl Modiadie. UCevuzile (34) waseMpangeni, eMathubu esigodini sasoFasimba, uchaza lokhu engomeni yakhe entsha ethi Pearl Modiadie. Le ngoma ikwialbhamu yakhe yesihlanu asanda kuyikhipha ethi Ngangizosakaza. “UPearl umuntu othandwayo. IZaziwa ayisangiphuthi ukuze ngimbone. Ngincoma ubuhle futhi ngijabulela nowayikhomba le ntombi,” kusho uCevuzile. I-albhamu yakhe inezingoma ezingu-16. “Kukhona ingxubevange yezingoma kukhona newushameni ethi UBabes Wodumo benoTipcee. Nami ngihlanganisa imilolozelo,” kusho yena.
Uthe isihloko se-albhamu usisusele engomeni exoxa indaba.
“Wonke umuntu ongena kwezokungcebeleka uhamba agaxele. Ngikhuluma ngabasakazi ukuthi inhloso yabo ukusakaza kodwa bazithola sebegaxele ezimpini ekubeni bebezozidlalela izingoma ezimnandi. Nezintatheli ngiyazibala kanjalo nabahleli bemicimbi.”
UCevuzile uphinde wenza kabusha ingoma kaDJ Tira ethi Malume esishaya ngesigqi sikamaskandi.
“Ngenze ekamaskandi ngoba abantu bayawucwasa umaskandi. Kukhona futhi abacwasa igqom’. Ngihlanganisa izinhlobo ukubakhombisa ukuthi umculo yinto eyodwa yokujabulisa abantu.”
Uveze ukuthi uyayithemba i-albhamu yakhe ukuthi izozidlela amahlanga emiklomelweni.
“Uma kungathiwa akuvote abantu ngizozithatha zonke izindondo ngoba imnandi. Kungcono kubhekwe indlela ingoma ebhalwe ngayo nobumnandi bayo. Thina asinabo abalandeli abaningi futhi manje emculweni sekunepolitiki yoqhawe lami. Abantu bavotela ngisho umuntu ongenangoma ngenxa yokuthi bambiza ngeqhawe labo.”
Ubonge abantu ngokumeseka noTheko Ngqulunga wenkampani asebenza nayo iThekotainment.