UJali uzobuyiswa kuleli inkece
UFUNA imali umdlali weBafana Bafana,u-Andile Jali, ongase abuye kwi-Absa Premiership ngesizini ezayo.
Emasontweni adlule uJali umemezele ukuthi uyabuya eNingizimu Afrika ngesizini ezayo. Njengamanje uyibamba kwi-KV Oostende yaseBelgium.
Inkontileka yakhe iyaphela ngoJuni. Imenenja yakhe,uMike Makaab weProSport International, uthe umdlali ufuna inkontileka ehehayo.
Phakathi kwamaqembu okuvela ukuthi agaqele uJali kukhona i-Orlando Pirates, Kaizer Chiefs, Mamelodi Sundowns neCape Town City.
“Wonke amaqembu amakhulu aseke asibuza ngesimo sikaJali kodwa alikho iqembu esisabe nezingxoxo ezisemthethweni nalo. Asikenzi lutho okwamanje. UJali ufuna iqembu elizomnika inkontileka ehehayo. Ufuna ukuya lapho ezonikwa khona imali enhle ezokwazi ukumenza aphile. UJali useyindoda yomndeni,ushadile manje. Kunokuthi iminyaka yehle uyakhula,” kusho uMakaab.
UJali ushiye kuPremier Soccer League (PSL) ngo-2014. Ubekade egijima kwiPirates adle nayo izicoco ezimbili ze-Absa Premiership, ezimbili zeMTN 8, Nedbank Cup neseTelkom Knockout.
“Akuqinisekisiwe ukuthi uJali uzobuya. Kusengenzeka noma yini ngekusasa lakhe. Kusengaqhamuka iqembu laphesheya nesicelo esihehayo sisithathe. Ngakho ngeke ngithi useyabuya. Isikhathi sisesiningi. Ake silinde sibone ukuthi kuzokwenzekani,”kusho uMakaab.
UJali akadlali kulezi zinsuku eqenjini lakhe ngenxa yokuthi usalimele. Kulindeleke ukuthi aze abuyele enkundleni ngesizini ezayo. Kuthiwa kungenzeka abuyele kwiSundowns uma ebuyela eNingizimu Afrika.
“Asikhohlwe yiSundowns okwamanje. Njengoba ngisho akukenzeki lutho,” kusho uMakaab ebalekela umbuzo wokuthi iSundowns yaziwa ngokunika abadlali izinkontileka ezihehayo.
UJali uyisithenjwa kwiBafana. Usedlale imidlalo ewu-44, washaya amagoli amahlanu.