Ithemba lendondo kwiBlitzbokke e-Australia
KUBHEKWE lukhulu eqenjini lakuleli lamaSevens, iBlitzbokke, eliya kumaGold Coast 2018 Commonwealth Games (GC2018) e-Australia lithwelwe ngeqoma ukwandisela iNingizimu Afrika izindondo njengoba kuyilona futhi elivikela isicoco. Imidlalo iyaqala namuhla e-Australia kodwa eyamaSevens izoqala ngasekupheleni kwenyanga. Ukuqala kwale midlalo kuphahlwe umzuliswano weHSBC World Sevens Series waseHong Kong (6-8 Ephreli) noseSingapore oqala ngo28 Ephreli.
Kungena indaba yeHSBC Series nje, iBlitzbokke izihola phambili ngamaphuzu angu109 ngemuva kwemilenze eyisithupha kweyishumi. Kuyiwa e-Australia, iBlitzbokke ilale isibili emzuliswaneni obukhona. Elakuleli limiswe kabi yiFiji endaweni yesibili ngamaphuzu angu-101 kulandele iNew Zealand ngawu-92 bese kuvala i-Australia ngawu-84.
Okucacayo wukuthi kungase kube nzima kwiBlitzbokke ngoba wonke la maqembu ayimise kabi kwiHSBC Series akhona womane eGold Coast.
Phakathi kwezizathu abasondelene nalolu hlobo lombhoxo abazibeka phambili ukuthi zizoba wusizo kwiBlitzbokke wukuthi amaCommonwealth Games asezweni leli qembu elinomlando omuhle kulona. IBlitzbokke izovikela isicoco esidle ngo-2014 eScotland okuyizwe elise-Europe kanti leli qembu alijwayele ukudlala khona.
EzikaNeil Powell zinqobe eScotland ngokuguqisa iNew Zealand ngo 17-14 enkundleni enomlando kunobhutshuzwayo i-Ilbrox. Okunye okuhlukile ngalo mqhudelwano waseGold Coast ukuthi kuzoqhudelana abesifazane kumaSevens okokuqala emlandweni wamaCommonwealth Games. Kowabesifazane kunamazwe ayisishiyagalombili azohlukaniswa abe amaqoqo amabili. Kwabesilisa amazwe angu-16 kanti awakhona amaqoqo azohlukaniswa ngamaqoqo amane. IBlitzbokke ifakwe ku-Pool A neScotland, Papua New Guinea neMalaysia. Kwelabesifazane iqoqo lakuleli lifakwe ku-Pool A lapho lizodudulana neNew Zealand, Canada neKenya.