Uvaleliswe ngesitayela umshwibi wamaProteas
SIVALELISWE ngesitayela isilomo somshwibi wamaProteas uMorne Morkel esesithatha umhlalaphansi.
Izolo amaProteas avithize i-Australia ngama-run angu-492 emdlalweni we-Test yokugcina ebiseBidvest Wanderers Stadium, eGoli. Elakuleli liwine ithosi ngosuku lokuqala laqoka ukubhetha kuqala.
Lishaye ama-run angu-488 seliphume lonke kwi-Innings yalo yokuqala kwathi i-Australia yaphuma yonke isibhale ama-run angu-211 ebhodini. AmaProteas abuyile angena enkundleni kwiInnings yawo yesibili afike ashaya ama-run angu-344 ngemuva kwalokho athi aseyifuna esitikini i-Australia. Ama-Aussies abedinga ama-run angu-624 ukuze anqobe kodwa aphume wonke esenze amarun angu-119.
Lokhu kusho ukuthi elakuleli lishaye i-Australia okokuqala eNingizimu Afrika emidlalweni yochungechunge lwama-Test selokhu labuyiselwa emidlalweni yamazwe ngo-1992. AmaProteas anqobe ngo 3-1 kulolu chungechunge lwemidlalo emine yama-Test obeludle ngezigigaba.
Emdlalweni wayizolo uMorkel ubedlala umdlalo wakhe wokugcina kwelesizwe. Udlale imidlalo engu-86 wahlomula ngamawikhethi angu-309. Emidlalweni yosuku olulodwa udlale imidlalo engu-117 wathatha amawikhethi angu-188 kwathi kweyeT20 wathatha amawikhethi angu-47 emidlalweni engu-44.
“Bengingeke ngikwazi ukuthi ngingashwibi ngomdlalo wami wokugcina. Ngihlale phansi nodokotela ngamtshela ukuthi akenze noma yini angayenza ukuze ngikwazi ukudlala. Ngeneme ngakho konke. UVern (Vernon Philander) wenze ezibukwayo namuhla ekuseni (esho izolo). Indlela abeke ngayo ibhola ezindaweni eziyingozi ayichazeki. Ngifuna ukubonga wonke umuntu ongesekile. Ngizithokozele izinsuku zami zokugcina eqenjini lesizwe. Ngifuna ukubonga umndeni wami ngokungeseka kule minyaka engu-12 eyedlule,” kusho uMorkel ekhuluma nengwazi yamaProteas uShaun Pollock kuthelevishini.
UMorkel uqale ukudlala kwelesizwe ngo-2006. Ukaputeni uFaf Du Plessis ukubeke kwacaca ukuthi bazomkhumbula.
“Ungumdlali oyisipesheli. UMorkel uthole inqwaba yezincomo kulezi zinsuku ezedlule futhi zonke zimfanele. Uyimvu yeNkosi. Udlale ngendlela eseqophelweni eliphezulu. Nguyena oqhulula amahlaya ekhempini. Sizomkhumbula kakhulu njengomuntu kanjalo nasenkundleni. Noma ngubani ozothatha indawo yakhe ubhekene nenselelo,” kusho uDu Plessis.
UKagiso Rabada uqokwe njengomdlali ovelele kuchungechunge kwathi uPhilander waqokwa njengomdlali ovelele emdlalweni. AmaProteas asazothi ukuhlaba ikhefu, umdlalo olandelayo ungo-Agasti lapho ezovakashela khona eSri Lanka.