Umqansa omele iFree State Stars ezotholana naMakhosi
I-FREE State Stars ibhekene nomqansa wokuqeda ishobolo leminyaka ihlulwa wukushaya iKaizer Chiefs emidlalweni ye-Absa Premiership.
Namuhla ngo-7.30 ebusuku, iStars izodudulana naMakhosi emdlalweni weligi eGloble Park, eFree State.
Emzuliswaneni wokuqala la maqembu adlale ngokulingana ngo 1-1 eMoses Mabhida Stadium, eThekwini emdlalweni weligi.
IStars sagcina ukuqumba phansi iChiefs emidlalweni yeligi ngoDisemba 11 ngo-2010. Kusukela lapho ayikaze iphinde iyishaye iChiefs emidlalweni yamaphuzu. Ngo-2010, iStars yanqoba ngo 1-0 wegoli likaBoitumelo Sekgobela.
Ngesizini edlule iChiefs iqoqe amaphuzu ayisithupha emidlalweni emibili eyidlale neFree State Stars. Emzuliswaneni wokuqala Amakhosi avithiza iFree State ngo 2-0 kwathi kowesibili ayibolisa ngo 3-1.
La maqembu aphinde aqhathwa kwi-semi final yeNedbank Cup. Umqeqeshi weStars uLuc Eymael ukhonjwa kuMakhosi. Inkontileka kaSteve Komphela iyaphela ngoJuni. Selokhu ejoyine iChiefs kumasizini amathathu adlule akakaze awine ndebe. Mancane amathuba okuthi inkontileka yakhe izovuselelwa.
IChiefs neStars bagcwele ukuzethembakulandela ukuzibekisela indawo kumasemi final. IStars ithele othulini Ubuntu Cape Town sekukhahlelwa amaphenathi kwathi Amakhosi aguqisa iBaroka ngo 1-0.
iChiefs iphinde yazenzela kwiStars ngo-2015/16 iqoqa amaphuzu amane. Emzuliswaneni wokuqala ilobole iStars ngo 4-0 kwathi kowesibili yadlala ngokulingana ngo 2-2 naleli qembu.
Ngo-2014/15, iChiefs iphinde yanqoba ngamaphuzu ayisithupha kwiStars. Inqobe ngo 1-0 ekuhambeni yaphumelela ngo 2-1 ekhaya.
IStars ihlezi endaweni yesine kwi-log ngamaphuzu angu-37 emidlalweni engu-24. Ngakolunye uhlangothi Amakhosi ayibambe endaweni yesihlanu ngamaphuzu angu-36 ngemuva kwemidlalo elinganayo.
Ngo-2013/14, iChiefs izitholele amaphuzu amane kwiStars. Amakhosi anqobe ngo 2-0 ekuhambeni emzuliswaneni wokuqala kwathi kowesibili adlala ngokulingana ngo 1-1 ekhaya.
Inhlanhla yeStars uma ibhekene neChiefs ibukeka isemidlalweni yemikhumulajezi kwazise ngesizini edlule leli qembu yilona eliwashise Amakhosi ijezi kwiTelkom Knockout kumaphenathi eMoses Mabhida.
Ngo-2011/12 iwashise iChiefs ijezi kuma-quarterfinal eNedbank Cup ngo 1-0. Imidlalo yeligi iyona ebaphikayo ngoba nango-2012/13 iChiefs iphinde yazitamuzela iqoqa amaphuzu amane. Inqobe ngo 2-1 yadlala ngokulingana ngo 0-0. Ngo-2011/12, iChiefs ihlomule ngamaphuzu ayisithupha kwiStars.
Egcina ukuhlangana la maqembu eMabhida abaqeqeshi baphuma bezwelana ngengcindezi yomsebenzi abawenzayo kodwa kulokhubazobhekana kunokungezwani. UKomphela usanda kukhuluma ngabaqeqeshi abanyonyobela umsebenzi wakhe u-Eymael okwabamataniswa nawo. Lo mqeqeshi ucashunwe kwelinye lamaphephanda ethi uKomphela akangahlulwa umsebenzi bese efaka igama lakhe.