KUKHONA OKUSINA KUJEQEZA ABASE-KZN KWI-PIRATES
IQHAWE lakho elingabuthi quthu ubuthongo lihoshe ezithi bangase bakhonjwe indlela kwiOrlando Pirates abadlali ababili baKwaZulu Natal. UThamsanqa Gabuza waseMnambithi noThamsanqa Sangweni waseDondotha, eMpangeni yibona adlali okungase kuhlukane inhloko nesixhanti kubona nePirates ekupheleni kwesizini.
Kusukela efikile kwiBucs, uSangweni usaphumelele ukuqala imidlalo emithathu kuphela. Kusukela iPirates iwele ezandleni zethimba elisha labaqeqeshi bobabili laba badlali ababonwa nangokhalo. Uze abe ngcono uGabuza ngoba uke angene yize kusuke sekusele amanembe kodwa uSangweni kubheda kakhulu kuyena.
Kungenzeka yini ukuthi uSangweni ufanelwe amaqembu athathwa njengamancane? Iqhawe lakho likubuza lokhu ngoba ubevutha uphondo ekuMaZulu. Kube yinto efanayo ekwiChippa United. Nangesikhathi ebolekiswe kwi-Ajax Cape Town ubengesinye sezithenjwa. KwiPirates uthwele kanzima obekuyinto efanayo nangesikhathi ekwiMamelodi Sundowns.
Akubona bodwa abadlali baseKZN abangase badliwe yizembe, kukhona negama lika-Ayanda Gcaba, Thembela Sikhakhane noNkosinathi Mthiyane.
UGabuza oke waba yisithenjwa sePirates udlale amahlandla angu14 esiwombeni sokuqala sesizini kodwa usabonakale kabili kuphela nonyaka. Uthwaliswe kanzima uJustin Shonga waseZambia ofike kwazwakala. Kukhona no-Augustine Mulenga okusobala ukuthi ulandelwe ukuzobangisa uShonga phambili. Inkinga kaSangweni wukuthi akalitholi ijezi nje, ayaqina namahlebezi athi uBen Motshwari weBidvest Wits usendleleni ebheke eMayfair.
Ngaphandle kukaMotshwari, uBrilliant Khuzwayo weKaizer Chiefs noPhumlani Ntshangase weWits kuthiwa babheke emkhunjini weBucs.