Sisibuka eduze isicongo isithandwa sePirates
ISITHANDWA esisha sabalandeli be-Orlando Pirates uXola “Ten Ten” Mlambo sesijike unina obezifela ngeKaizer Chiefs waphenduka umlandeli weZimnyama.
UMlambo (26) odabuka eDobsonville, eGoli ukhule engumlandeli waMakhosi. Lokhu kungenxa yokuthi unina ubezifela ngaleli qembu.
“Mina ngikhule ngithanda iKaizer Chiefs. Umfowethu nobaba bebehamba nePirates. Umama bekunguyena kuphela ozifela ngeChiefs. Nami ngilandele yena. Akazange aphatheke kabi ngesikhathi ngijoyina iPirates. Uyaqonda ukuthi umsebenzi. Kunalokho ujabule ngoba uyazi ukuthi iPirates yiqembu elikhulu. Akazange angibuze ukuthi kungani ngingajoyinanga iChiefs. Ukufanise nesibusiso ukujoyina kwami iqembu elikhulu. Ngakho angingabazi ukuthi akekho oseseka iChiefs manje ekhaya. Sonke sesihamba nePirates,” kusho uMlambo.
Le njini ifike kweZimnyama ngoJanuwari njengoba bekuvulwe iwindi lokuhwebelana ngabadlali. Ubegijima kwiBidvest Wits. Namuhla ngo-7.30 ebusuku uMlambo kubhekwe ukuthi asize iPirates iqoqe amaphuzu amathathu isibhekene neBloemfontein Celtic e-Orlando Stadium, eSoweto, eGoli emdlalweni we-Absa Premiership.
“Ukugqoka ijezi lePirates ngeke ukufanise nokugqoka ijezi leChippa United neleBidvest Wits okungamaqembu ebengidlala kuwona phambilini. ElePirates linomehluko omkhulu. Liza nengcindezi ephelezelwa yizinto ezinkulu ezibhekwe kuwena njengomdlali neqembu. Uma usudlala kwiPirates usuke ungasabukwa ngabantu abangu-15 noma abangu-20. Yize mhlawumbe kungagcwali ngaleyo ndlela enkundleni kodwa kukhona nalabo abalibuka kwithelevishini iqembu ababheke lukhulu kithina. Abantubayaqala bakuqaphele uma usudlalela iPirates. Ngisadlala kwiWits nginesiqiniseko sokuthi bekunabantu abake bangidlule endleleni bengazi ukuthi ngidlala ibhola esigabeni esikhokhelayo kodwa sekuhlukile manje. Izinto engizenzayo sekumele ngizibheke,” kusho uMlambo.
IPirates isele ngephuzu kwiMamelodi Sundowns eqhwakele. EZimnyama zihlezi endaweni yesibili kwi-log ngamaphuzu angu-42 emidlalweni engu-24.
“Indlela esidlala ngayo ayigqugquzelwa wukujaha iSundowns noma wukusala ngephuzu kwiSundowns. Ukudlalela iPirates nje kukodwa kwenza ube nogqozi. Kumele uhlale ukhuthazekile ngaso sonke isikhathi. Indaba yokuhlala endaweni yesibili yinto esingayifakile emqondweni.
“Ngeke sikubalekele ukuthi sinalo ithuba lokuwina iligi kodwa lokho akusenzi sitatazele nokucabanga ngezinto ezikude. Thina sibhekana nomdlalo owodwa ngesikhathi. Sifuna ukubuyisa isithunzi seqembu. Ngakho ngeke sizifakele ingcindezi. Njengamanje awusekho umdlalo olula. Yonke imidlalo inzima,”kusho uMlambo.
Uma iPirates inganqoba namuhla bese iSundowns ezobhekana neChippa United eLoftus Stadium ngesikhathi esifanayo, ilahle amaphuzu, izoqhwakela okokuqala kwilog kule sizini. Ngesizini edlule ezikaMlambo ziqede isizini endaweni ka-11 ngesikhathi yena enqoba isicoco neWits.