Kuyasuka lokho ngoshintsho kwiSA FM
ZIYAQALA ukuzwakala emoyeni namuhla izinguquko emsakazweni iSA FM futhi negama lesilomo uSakina Kamwendo owakhishwa emoyeni uhlelo lungakapheli emasontweni amabili edlule liyavela.
Uhlelo lukaSakina, owayengena ekuseni phakathi nesonto, lwanqamuka luphakathi kwadlalwa umculo kwaze kwashaya isikhathi sokuthi luphele. Lesi sigameko sagxekwa nayiSouth African National Editor’s Forum (Sanef).
Ngokwesitatimende esikhishwe ngokhulumela iSABC, uKaizer Kganyago, uSakina usezongena ihora elilodwa kuphela phakathi nesonto.
Uhlelo lwakhe luzongena ngo-12 kuya ku-1 emini ngoMsombuluko kuya kuLwesihlanu lapho ezobe ekhuluma khona ngezisematheni.
UKganyago watshela abezindaba ngesikhathi evakashele eThekwini ukuthi ziningi izinguquko ezizoba khona kwiSA FM njengoba sebefuna ukuthi ibe yisiteshi sezingxoxo.
Abasakazi abasha nguStephen Grootes, Ernest Pillay noThabiso Mosia. UGrootes uzokwethula uhlelo lwasekuseni ngo-6 kuya ku-9 phakathi nesonto. Ngo-9 kuya ku-12 kuzongena uBongi Gwala bese kulandela uSakina.
UCriselda Dudumashe usezongena ngo-1 kuya ku-3 phakathi nesonto bese kulandela u-Ernest Pillay obekwiRadio 2000 ozokwenza uhlelo lwantambama.
UThabiso Mosia obenza ezemidlalo kwiPower FM yaseGoli uzosakaza ngo-7 kuya ku-8 ngoMsombuluko kuya kuLwesine kuthi ngoLwesihlanu kube ngu-6 kuya ku-7.
Ngezimpelasonto kuthiwa sekuzoncipha izingxoxo kwande umculo ozobe wethulwa ngabasakazi uMichelle Constant, Shado Twala, Rowena Baird noRicky Stevens.
Umphathi-siteshi obambile uPeter Mashamba unxuse abantu ukuthi balalele namhlanje bezwe abeza nakho.
Khonamanjalo, ziqalile ngeledlule izinguquko zeRadio 2000. Uhlelo lwantambama selushayelwa nguGlen Lewis phambilini obekwiTouch HD. Ngo-9 kuya ku-12 emini phakathi nesonto sekungena uDavid Mashabela. Uhlelo lwezemidlalo phambilini kwi-website yesiteshi bekubhalwe ukuthi luzokwenziwa nguRobert Marawa kodwa manje akusafakwe gama lamuntu.