Izobonwa abaseThekwini eyanqotshwa yiMambazo
LIZOYIGUBHA nabalandeli balo baseThekwini impumelelo yendondo yesihlanu yamaGrammy iqembu lesicathamiya iLadysmith Black Mambazo njengoba ibuya ngoLwesithathu ngemuva kokunqoba indondo.
IMambazo yanqoba indondo yeBest World Music Album nge-albhamu yayo iShaka Zulu Revisited: 30th Anniversary Celebration ngasekuqaleni konyaka.Yanqoba iphesheya inomjikelezo wezinyanga ezintathu.
Esitatimendeni esithunyelwe kuvela ukuthi izotheleka esikhumulweni sezindiza iKing Shaka International Airport ngo-4.30 ntambama ngoLwesithathu lapho kulindeleke ukuthi yamukelwe yiMeya yeTheku uNkk Zandile Gumede.
NgoLwesine izozungeza izitaladi zeTheku ihamba ngebhasi elivuleke ukhakhayi ikhombisa abakuleli dolobha ngendondo yalo. Umjikelezo uzoqala ngo-10 ekuseni kuze kube wu-1 emini.
“Umjikelezo uzophela ngaphandle kwaseCity Hall lapho izikhulu zomkhandlu zizokhuluma nabantu bese iLadysmith Black Mambazo icula kancane,” kusho isitatimende.
Leli qembu eligubha iminyaka engu-58 licula lithe indondo liyibhekise kowayengumengameli ongasekho uNelson Mandela njengoba ekhunjulwa kulo nyaka. Lizohlala kancane kuleli kwazise ngo-Ephreli 19 lizoqala umjikelezo ozodonsa inyanga wokuhambela amazwe ase-Europe. Izocula emcimbini wokugubha usuku lokuzalwa kweNdlovukazi yamaNgisi.
Izobuya ngenyanga ezayo izonandisa kwiBassline Fest eConstitution Hill eGoli ngoMeyi 26. NgoJuni 1, 2 no-3 izonandisa emcimbini wokuhlonipha uMandela eState Theatre, ePitoli.