Sibhekwe ngabomvu eselakwaShembe
SIBHEKWE ngabomvu isinqumo samajaji ngombango oqhubekayo ngomele ahole ibandla lamaNazaretha aseBuhleni njengoba icala lizohlala izinsuku ezimbili kuleli sonto eNkantolo eNkulu eMgungundlovu.
Kulindeleke ukuthi kukhishwe isinqumo sokuthi ngubani okumele ahole leli bandla njengoba icala lizohlala ngoLwesithathu nangoLwesine.
Umbango wawuphakathi kukaMnuz Vela Shembe ewayeseThembezinhle noMnuz Mduduzi Shembe owasala eBuhleni.
Ijaji Achmat Naaim Jappie, elalingumahluleli ecaleni lombango wobuholi bebandla, eNkantolo eNkulu eThekwini lathi ngumholi waseThembezinhle okumele athathe isihlalo esashiywa wuThingolwenkosazana.
UMnuz Vela ukhothame nyakenye. Ibandla selihowa uMnuz uPhinda Shembe.
UMnuz Thokozani Mncwabe waseBuhleni uthe bafisa amajaji aveze ukuthi uNyazi wumholi ofanele.
“Amajaji awachemile, azobheka izinhlangothi zombili bese ekhipha isinqumo. Esikufisayo eBuhleni wukuthi amajaji ahambele kuthina, uNkulunkulu abenathi sinqobe,” kusho uMncwabe.
Uthe uma behlulwa futhi ngeke asho ukuthi bazolidlulisa yini icala ngoba bazobheka umyalelo wenkosi uNyazi.
UMnuz Nkululeko Mthethwa waseThembezinhle uthe nabo basibheke ngabomvu isinqumo. “Silindele ukuba siphinde sinqobe njengoba kwenzeka enkantolo eThekwini. Asilindele ukuba kube noshintsho kulokhu okwakushiwo yijaji. Uma kwenzeka belidlulisa futhi icala, nalokho siyokwamukela,” kusho uMthethwa. AbaseThembezinhle bathe kuzobe kukhona abafundisi babo beyolalela isinqumo. AbaseBuhleni bathe kungenzeka kube khona abazalwane bebandla.
“Sifisa abazalwane abazokuya ecaleni baziphathe kahle. Kungabi khona ozothuka inhlamba nozolwa. Konke sifuna kwenzeke ngokuthula,” kusho uMncwabe.
Inkosi Vimbeni ‘Thingolwenkosazane’ Shembe ithathe ubuholi njengendodana yokuqala. Ikhothama ngoMashi 2011 kube nokuhlukana phakathi ebandleni lakwaShembe njengoba inkosi yamaQadi uMqoqi Ngcobo yamemezela uMnuz Mduduzi Shembe njengomholi omusha webandla ekubeni kwakunencwadi eyayikhomba uMnuz Vela Shembe, indodana yeNkosi yesibili uJohannes ‘Ilanga’ Shembe, njengomholi omusha. SICELA niziqinisekise izinombolo eziwinile ezindaweni zeLotto ezisemthethweni. ISOLEZWE ngeke likuvumele ukuthathelwa izinyathelo zomthetho uma kwenzeke iphutha.