‘Akuboshwe abanikazi bamatekisi ezingozi’
UHULUMENI waKwaZuluNatal usuphakamise ukuthi kuboshwe abanikazi bamatekisi asuke ethinteka ezingozini zomgwaqo ngenxa yokungabibikho esimeni esifanele sokuthutha umphakathi.
Lesi siphakamiso sivele ngoMgqibelo ngesikhathi kunenkonzo yomngcwabo wabagibeli abangu-11 eNhlungwane, eMaBomvini, eMsinga, abashone engozini yetekisi eyenzeke eNgome ngePhasika.
Kule ngozi kushone abagibeli abangu-14 okuhlanganisa nomshayeli wayo (27). UNgqongqoshe wezokuThutha KwaZulu-Natal, uMnuz Mxolisi Kaunda, uthe bafuna ukuyiqinisa indaba yokuba kuboshwe abanikazi bamatekisi asuke edale izingozi.
“Iqiniso ukuthi umshayeli wetekisi usuke eqashiwe ukuba azosebenza. Uma esewutholile umsebenzi uyabuya nemali ayinikeze umnikazi wetekisi. Esikhundleni sokuthi usomatekisi alungise imoto ngale mali esetshenzwa wumshayeli, uvele amkhombe ngayo emgwaqweni ingenamabhuleki futhi inezimpandla zamathayi nokunye okungalungile. Ngakho umshayeli kusuke kungekho angakwenza ngoba yena usuke esebenzela umndeni wakhe. Yingakho sesiphakamisa ukuthi kungaboshwa nje umshayeli kuphela kodwa nomnikazi avalelwe ngoba itekisi yakhe esuke isibulele abantu ngenxa yobudedengu bokungayinakekeli. “Sikwenzile lokho ngengozi eyenzeka eFields Hill lapho kungagcinanga nje ngokuboshwa komshayeli weloli kodwa nomnikazi walo wavela enkantolo, “kusho uKaunda. Uthe itekisi yayingenawo amabhuleki. IMeya yaseMzinyathi, uMfundisi uPetros Ngubane, uthe ngesikhathi befika endaweni yesigameko babona ukuthi amabhuleki emoto ayenqamuke eyizicucu. Kule ngozi kwashona nezingane ezimbili ezazihamba nonina obangwa nezibi esibhedlela. Omunye umgibeli kuvela ukuthi wayephuthuma emngcwabeni wakubo kodwa akabange esafika. Imindeni isola nokuthi umshayeli wayephuzile.
UMnuz Bheki Phungula, okhulumele umndeni wakwaPhungula, uthe bacela kulungiswe indlela amatekisi athutha ngayo abantu njengoba le yayilayishe abantu abangu-17.
“Abantu balayishwa okwamasaka empuphu. Akube abokugcina laba abashonile, abagibeli abaphathwe kahle ematekisini,” kusho uPhungula.
Okunye okuvelile ukuthi izidumbu zabanye abagibeli zatholakala zilenga ezihlahleni lapho itekisi eyayiphoseke khona.
Umshayeli ungcwatshwe ngoMgqibelo kodwa inkonzo yakhe ayihlanganiswanga neyabagibeli. Ababili bafihlwe izolo.
Yonke imindeni eshonelwe ingomakhelwane futhi ihlobene. Okunye okuhlale obala ukuthi nakuba abantu bekhuziwe ngokuvuma ukulayishwa ngokweqile kodwa kuthe uma sekuhanjwa abangakugqiza qakala konke lokho. Abanye babonakale bempintshene emavenini sekuyiwa emathuneni.