Kulindeleke osaziwayo emngcwabeni kaWinnie
UMNGCWABO kaMama weSizwe, uNkk Winnie Madikizela-Mandela uzohanjelwa osaziwayo baphesheya okubalwa kubo umkhangisi wengqephu ongaconsi phansi uNaomi Campbell nomfundisi olwela amalungelo esintu uRev Louis Farrakhan.
UNaomi uziqinisekise ekhasini lakhe leTwitter izindaba zokuthi uzongcwaba uNkk Madikizela-Mandela. Lezi zindaba zimenyezelwe yi-ANC izolo njengoba amalungu ayo abesezinkonzweni zokumkhumbula emabandleni ahlukene. Izolo bekunenkonzo esontweni laseWeseli abekhonza kulo eliseMeadowlands, eSoweto, ebihanjelwe ngamadodakazi akhe oNksz Zindzi noZenani Mandela.
UMnuz Pule Mabe okhulumela i-ANC uthe ziyaqhubeka izikhumbuzo zokugubha impilo kaNkk Madikizela-Mandela ezweni.
Ubalule ukuthi namhlanje kuzovulwa ngokusemthethweni isikhumbuzo sikaNkk MadikizelaMandela eLuthuli House esizolandelwa yinkonzo ezoba seStandard Bank Arena eGoli nenye ezoba seMbhizana. Ezinye izifundazwe zizoba nezikhumbuzo zazo.
UNobhala Jikelele we-ANC, uMnuz Ace Magashule, uthe ngoLwesibili kuzogujwa impilo kaNkk Madikizela-Mandela neyesishoshovu somzabalazo esasingumholi weSACP noMkhuzi wamaSosha oMkhonto weSizwe, uMnuz Chris Hani owabulawa ngo1993, eBoksburg.
NgoLwesithathu kuzoba nenkonzo yesikhumbuzo esontweni iRegina Mundi, eSoweto ezobe iphethwe nguhulumeni. NgoLwesine omama boManyano bazoba nomkhuleko bebambisene ne-ANCWL. NgoLwesihlanu kunenkonzo yesikhumbuzo eNyuvesi yasePitoli nomlindelo ohlelwe yi-ANC e-Orlando Stadium.
UMagashule uthe ngoMgqibelo kuzoba nenkonzo yomngcwabo e-Orlando Stadium. UNkk Madikizela-Mandela uzofihlwa eFourways Memorial Park, eGoli kanti uzohlonishwa ngomngcwabo kahulumeni.