Abe-MK baziqhelanisa nokudubula kwaWinnie
INHLANGANO yomakadebona boMkhonto weSizwe Umkhonto weSizwe Military Veterans Association (MKMVA) iyaziqhelanisa nesigameko sokudubula emoyeni esenzeke ngaphandle komuzi kaNkk Winnie Madizikizela-Mandela ngoLwesihlanu ebusuku.
Izolo okhulumela iMKMVA kuzwelonke, uMnuz Carl Niehaus, uthe bakhathazekile ngezigameko zokudubula emoyeni ezenzeke ngaphandle komuzi kamama wesizwe.
“SiyiMKMVA siyamhlonipha uNkk Madikizela-Mandela njengesosha leMK nomunye wokhomanda bethu. Njengoba simhlonipha umama futhi siyakuqonda ukulila kwamasosha ngokushona kwakhe kodwa ngeke size sikuvumele ukuthi abantu baziphathe budlabha,” kusho uNiehaus.
Uthe banxusa wonke amalungu abo ukuthi awuyeke lo mkhuba bese eyababika labo abawenzayo emaphoyiseni.
Uthe bakhathazekile ngokuthi kungenzeka kube khona izigebengu esezigila imikhuba bese kupendeka kabi amalungu abo.
“Siyaluseka uphenyo lwamaphoyisa oseluqaliwe sifuna labo okuzotholakala ukuthi yibo abenze lo mkhuba ukuba bajeziswe,” kusho uNiehaus.
NgoMgqibelo ebusuku, uKhomishana wamaPhoyisa kuleli uMnuz Bheki Cele, uthe azowu-khomba umuzi onotshwala amalungu omakadebona beMK athintekayo kulesi sehlakalo.
UCele uthe sebeqalile ukwenza uphenyo ngesigameko sokudubula ngaphandle komuzi kaNkk MadikizelaMandela.
“Siwathathile amagobolondo ezinhlamvu siyowahlola, sizophinde sibheke nokuthi izibhamu ezisetshenzisiwe azithinteki yini kwamanye amacala,” kusho uCele.
UCele uyichithile imibiko ethi kukhona isidumbu somuntu esitholakele eduze komuzi kamama wesizwe ngemuva kwesehlakalo sokudubula.
“Akekho umuntu oshonile futhi olimele ngenxa yesigameko sokudubula esenziwe ngamalungu oMkhonto weSizwe,” kusho uCele.
Uthe bayasola ukuthi izibhamu obekudutshulwa ngazo azikho emthethweni.
NgoMgqibelo kusabalale imibiko ethi kutholakale isidumbu budebuduze nomuzi kaNkk Madikizela-Mandela kodwa amaphoyisa akuchithile lokho.
Ngokwemibiko yabezindaba ngoLwesibili nangoLwesithathu kube nezigameko zokudubula ezenzeke ngaphandle komuzi kaNkk Madikizela-Mandela.
Ezinkundleni zokuxhumana kubonakale owesilisa obehamba nge-Mercedes Benz ephethe isibhamu esikhulu edubula lapho bekukhona abantu abaningi abebegqoke izikibha zikaKhongolose.