Uphika eyokugudluza uRamaphosa
UMXHUMANISI we-ANC KwaZulu-Natal, uMnuz Sihle Zikalala, izolo uyichithile imibiko yokuthi ababeseka owayenguMengameli wezwe, uMnuz Jacob Zuma, banemihlangano yokudicilela phansi isithunzi sikaMengameli Cyril Ramaphosa nokumgudluza esikhundleni.
UZikalala uyichithile imibiko eshicilelwe yiphephandaba langeSonto, iSunday Times, ethi yimfundisoze ehlose ukuhlukanisa inhlangano ebusayo. “Baningi abantu abafuna ukuhlukanisa i-ANC ngemfundisoze namanga. Kubalulekile ukuthi amalungu e-ANC asekane ukuze sikwazi ukusekwa wumphakathi.” Uthe akekho umuntu ozoseka i-ANC uma ihlukene phakathi futhi yisona sizathu esenza ubuholi be-ANC bukaRamaphosa bugqugquzele ubumbano. “Akekho umuntu waKwaZulu-Natal engimuzwe ethi uzovotela elinye iqembu ngonyaka ozayo. Wonke amalungu e-ANC ahlangene futhi azovotela umbutho wabantu ngonyaka ozayo,” kusho uZikalala.
Embikweni weSunday Times kuvela ukuthi kuneqembu elisha elisungulwe ngumngani kaZuma, onguMengameli weTwelve Apostles Church in Christ, uMnuz Caesar Nongqunga. Kuthiwa uZuma uliphasisile iqembu futhi sekube nemihlangano yokuzama ukususa ubuholi bukaRamaphosa.
Kulo mbiko kuthiwa noNobhala we-ANC, uMnuz Ace Magashule, uyazi ngeqembu. Kuthiwa bonke abaseka uZuma bazovotela iqembu elisha kanti ngoLwesihlanu kubonakale uZikalala, uNdunankulu waKwaZulu-Natal, uMnuz Willies Mchunu, owayenguNgqongqoshe wezokuBusa ngokuBambisana nezoMdabu, uMnuz Des van Rooyen, nowayebhekelele ukusebenza kweSABC, uMnuz Hlaudi Motsoeneng, beseka uZuma obevele enkantolo enkulu yaseThekwini. Icala lihlehliselwe uJuni.