‘Isenesiqhoqho samadoda amhlophe iDA’
ABAHLAZIYI bepolitiki bathi akukho okusha okuphume engqungqutheleni yeDemocratic Alliance (DA) kwazise kusagcwele amadoda amhlophe esigungwini esiphezulu sobuholi.
Izolo uMnuz Mmusi Maimane ubuyiselwe esikhundleni sakhe sokuhola iDA, kwathi uMnuz James Selfe wabuyiselwa kwesokuba nguSihlalo weFederal Council.
Iphini lakhe nguMnuz Thomas Walters kuthi uMnuz Dion George abe nguSihlalo wezeziMali.
UMnuz Athol Trollip ubuyele esikhundleni sakhe sokuba nguFederal Chairperson ehlula uMnuz Solly Msimanga noNkk Anneline Lottriet.
Amaphini akhe ngoMnuz Ivan Meyer, Mike Waters noNksz Refiloe Ntsekhe.
Umhlaziyi wepolitiki, uMnuz Ralph Mathekga, uthe akukho okumangazayo ngemiphumela yeDA ngoba ubevele eshilo ukuthi ayikufuni ukuncintisana okuhle yize izigqaja ngokuba yiqembu elibuswa ngentando yabantu.
“Baye kule ngqungquthela uMaimane noSelfe kungekho abancintisana nabo. Ngokwazi kwami bebengafuni kube nokuncintisana kwezikhundla okusho ukuthi kunezinkinga ezithile kuleli qembu,” kusho uMathekga.
Uthe akazi ukuthi iDA izimisele ukulinqoba ngani ukhetho luka-2019 ngoba kucacela noma ngubani ukuthi ihlukene phakathi.
“UMaimane ubephakamise ukuthi ubuholi beDA bube nazo zonke izinhlanga zaseNingizimu Afrika kodwa iDA ayikufuni lokhu. Ize nohlelo lwayo lokubheka izindaba zoguquko eqenjini. Abesifazane asibaboni ezikhundleni eziphezulu. Angazi ukuthi iDA kungani ingafuni ukulungisa udaba lobuhlanga ngoba luseyinkinga enkulu esibhekene nayo,” kusho uMathekga.
Omunye umhlaziyi wepolitiki, uMnuz Thabani Khumalo, uthe ubuholi beDA busagcwele ibala elimhlophe ngoba vele iyiqembu elibhekelele izimfuno zabo.
“Abantu abamnyama abasebuholini beDA kufanele bacacelwe ukuthi basuke bemenyiwe ukuthi bazohola ngoba iqiniso wukuthi isagcwele abamhlophe futhi ivikela izimfuno zabo. OMaimane, Zwakele Mncwango nabanye abaholi abamnyama bebephakamise ukuthi kubhekwe udaba lobuhlanga kodwa iDA ayifuni ukulubheka kunalokho ithe abaholi bazoqokwa ngokwamakhono abanawo,” kusho uKhumalo.
Uthe yebo udaba lobuhlanga noguquko lufakiwe ezisombululweni zengqungquthela kodwa okubi wukuthi alubhekwa ngokuthi makube nesibalo esithile sabamnyama, abesifazane nentsha kodwa kuthiwa “kubhekwa amakhono” omuntu.
Uthe iDA isazoqhubeka nokubhekelela abamhlophe futhi akukho okutheni abaholi abamnyama abangakwenza ngalokhu.
UMaimane uthe akulona iqiniso ukuthi iDA ngeyabamhlophe kodwa ngeyabo bonke abantu baseNingizimu Afrika.
Uthe bazoqhubeka nokuqinisekisa ukuthi abantu banezindlu, umhlaba, umsebenzi futhi nomnotho uyakhula. “Asihambisani nodaba lokuthi umhlaba ubuyiselwe kubantu ngaphandle kwesinxephezelo ngoba iNingizimu Afrika yizwe elinomthetho. Kufanele abantu babe nophahla njengoba senzile eWestern Cape sanikeza abantu ama-title deeds angu-91 000,” kusho uMaimane.