Akanankinga yemali uBrickz onikwe ibheyili
UMMELI womculi we-kwaito, uSipho “Brickz” Ndlovu onikezwe ibheyili kaR80 000 yiNkantolo yeMantshi yaseRoodepoort ngoLwesihlanu esalinde isicelo sokudluliswa kokutholwa kwakhe enecala lokudlwengula, uthe unayo imali.
UBrickz wagwetshwa nyakenye ngokudlwengula intombazane eyayineminyaka engu-17 ngesikhathi idlwengulwa ngo-2013.
IMantshi yaseRoodepoort, uJohn Baloyi, yamthola enecala yamgweba iminyaka engu-15.
Ummeli wakhe, uMnuz Piet Du Plessis, uthe akanankinga yemali.
“Ubeyenza imali engaphakathi ngenxa yama-royalties. Imali ibingesiyo inkinga kodwa inkinga bekuwukuyithola ngaleso sikhathi,” kuchaza uDu Plessis.
Uthe lo mculi ujabule ngesinqumo senkantolo.
“Sinethemba lokuthi isicelo sokudlulisa icala sizophumelela nokuthi ukutholwa enecela kuzoguqulwa,” kusho uDu Plessis.
Uthe isicelo singase silalelwe ngo-Agasti eNkantolo eNkulu yaseGoli. UDu Plessis uthe lo mculi uzoqhubeka nempilo yakhe ayonandisa ezindaweni azomenywa kuzo.
I-African News Agency ibike ukuthi eminye yemibandela yokudedelwa kukaBrickz wukuthi angayishintshi indawo yokuhlala ngaphandle kokubikela umphenyi wecala.
Kuthiwa kumele anikezele ngezincwadi zokuhambela amazwe angaphandle, angasondeli ezikhungweni zokuphumela kwamanye amazwe, angaphumi eGoli ngaphandle kokubikela umphenyi wecala futhi abike esiteshini samaphoyisa eJabulani njalo ngoMsombuluko nangoLwesithathu.
UBrickz wazakhela ugazi kubathandi bomculo ngezingoma zakhe.