Kuqashwe abeMKMVA koweTheku
KUQASHWE amalungu angu-15 omakadebona boMkhonto weSizwe eMkhandlwini weTheku kungakapholi maseko egasele eCity Hall ngenhloso yokuzwakalisa intukuthelo yawo yokushaywa ngesithende ngeledlule.
Amalungu eMKMVA ngeledlule abebhikisha eThekwini aze ayovala imashi yawo eCity Hall lapho afike athula nohlu lwezikhalo zawo.
UMnuz Philani Mthembu weMKMVA uthe kuyacaca ukuthi eThekwini kufanele uze ulwe ukuze ulalelwe.
“Uma usazikhulumela eThekwini kuvele kuthiwe uyazidlalela kodwa uma uke waqala walwa yilapho kusukunywa khona, sekuphele isikhathi eside kakhulu izikhalo zethu zingasukunyelwa,” kusho uMthembu.
UMnuz Mthunzi Gumede, okhulumela ihhovisi leMeya yoMkhandlu weTheku uNkk Zandile Gumede, ukuqinisekisile ukuthi akhona amalungu eMKMVA aqashiwe emkhandlwini njengezisebenzi.
UGumede uthe bakhona nabanye abasazophinde baqashwe ngaphambi kokuthi kuphele lo nyaka.
Uthe kunomgomo okhona othi kumele babhekelelwe omakadebona bamasosha ngaphansi kohlelo lokuguqula izisekelo zezomnotho.
“Umkhandlu wethu unehhovisi labo omakadebona elifaka amalungu azo zonke izinhlangano ezabamba iqhaza emzabalazweni kubalwa ne-Apla,” kusho uGumede.
Ngakolunye uhlangothi, amalungu e-Apla wona akhala ngokushaywa ngesithende wumkhandlu uma kukhona amathuba avelayo.
Abe-Apla bakhala ngokuthi umkhandlu ubhekelela kakhulu amalungu eMKMVA bona ubashiye ngaphandle. USihlalo wePAC esifundeni iJoe Mkhwanazi okuyiTheku, uMnuz Richman Mhlongo, uthe bayakuqaphela ukuthi kukhona ukukhetha iphela emasini okwenzekayo eThekwini uma kunamathuba okufanele kuhlomule kuwo amasosha.
“Njalo uma kukhona abantu abaqashwayo kuthathwa abeMKMVA thina sishiywe ngaphandle okuyinto engeyinhle ngoba iMKMVA ne-Apla yinto eyodwa,” kusho uMhlongo.