Sizofa lapho efa khona uZuma -Dube
UMHOLI we-Ethekwini Community Church, uMbhishobhi uVusi Dube uthi abaholi bezenkolo bazofa lapho kufa khona obengumengameli wezwe uMnuz Jacob Zuma ohamba icala lenkohlakalo enkantolo. UDube ubephethe uhlelo olufishane ngesikhathi uZuma eqeda ukuvela eNkantolo eNkulu eThekwini ngoLwesihlanu. UDube ophinde abe yilungu lesiShayamthetho KwaZulu-Natal, uthe abalokhu bebuza ukuthi amakholwa ahlanganaphi nezepolitiki akudokwe ligayelwe bona lokho ngoba bona beseka uZuma.
“UMsholozi umsulwa kuze kube utholakala enecala. Ababuza ukuthi sihamba kanjani noZuma sibe singamakholwa okwabo ke lokho thina asixhumi emibuzweni yabo. Sasikhona nasekuqaleni uZuma ehlukunyezwa namanje simi naye futhi,’’ kusho uDube. Uthe abalokhu bemjoja ngaleyo mibuzo bazomthola kahle ngoba uZuma umholi osebenzele abantu ngokwethembeka. Kusuka ngoLwesine ebusuku umbhishobhi ubemataasa ehlanganisa umlindelo obuseAlbert Park. NgePhasika ubezimaziswe wuZuma ebandleni lakhe lapho efike khona wacela umkhuleko kubazalwane wathi akuthandazelwe ukubuya kukaJesu. UDube wayeshabasheka nomkhankaso wokweseka uZuma nasekuqaleni ngesikhathi esathweswe amacala engakabi umengameli wezwe.
Unxuse inqwaba yabantu ebikhona ukuthi iqhubeke nokweseka uZuma kuze kube sekugcineni ngoba bayazi ukuthi umsulwa. Uthe abathandazayo, babeke uZuma emkhulekweni njengoba ebhekene nesikhathi esinzima. Uthe bazoqhubeka nokumeseka bebambisene nezinhlaka ezehlukene okukhona kuzo iNafupa SA, iTransform SA neBlack First Land First eholwa uMnuz Andile Mngxitama.
UZuma naye uhambe emazwini kaDube wathi uyabathanda abaholi bezenkolo ngoba bahambisa izinto ngeqiniso abafezi izinhloso zabantu basemhlabeni. Ubabonge kakhulu ngokumeseka wathi mabathandaze ngamandla kulesi sikhathi sobunzima.