Ukhuthaze abaningi Nomzamo ubonisa ubumqoka bemfundo
NGESONTO eledlule, uNomzamo Mbatha ongumlingisi nosaziwayo, wethweswe iziqu ze-B Com Accounting e-University of Cape Town. UNomzamo ubuyele esikoleni wayoqedela iziqu zakhe azishiya phakathi ngenxa yokushoda ngemali, ukushonelwa ngamalungu omndeni wakhe elandelana nanokuthi wabona kungcono ukulandela amaphupho akhe okuyolingisa njengoba engomunye wabalingisi abahamba phambili beSibaya.
Lo mlingisi osengene nasemafilimini ufike endimeni yezokungcebeleka kwezwakala njengoba engomunye wosaziwayo abathandwayo eNingizimu Afrika futhi uyangenisa kancane kancane nakwamanye amazwe.
Imali uyenza ngokulingisa, ukuphatha imicimbi nangokuba yinxusa lezimpahla zokuzivocavoca, i-Puma, abacwali besikhumba, i-Neutrogena, abezinwele, i-L’Oreal Paris Hair nabezimoto zakwaAudi.
Uphinde abeyinxusa lophiko lweNhlangano yeZizwe olunakekela abantu ababhace kwamanye amazwe ngenxa yezimpi, i-United Nations High Commissioner for Refugees (UNHCR).
Zonke lezi zinto uNomzamo azenzayo sezimenze usozigidi emncane njengoba engakahlanganisi neminyaka engu-30 nokuyinto engajwayelekile eNingizimu Afrika ngoba indima yezokungcebeleka yincane futhi nemali ayiningi kangako.
Nakuba evelele kanjena uNomzamo kodwa ukubone kubalulekile ukubuyela esikoleni, aphothule izifundo zakhe njengoba namandla okuzikhokhela esenawo manje.
Abanye bebengeke besayingena indaba yesikole uma sebezuze izinto uNomzamo asezizuzile ngoba bebezobona singekho isidingo sesikole ngoba sebeyitholile indlela yokwenza imali.
Ngokuphindela kwakhe esikoleni, uNomzamo, okunezigidi zentsha ezibukela kuye, usenze umsebenzi omkhulu wokubakhombisa abalandeli bakhe ukuthi imfundo ibalulekile akukhathaleki ngisho kungathiwa usuphumelele kangakanani empilweni.
Baningi abazokhuthazeka ukuthi babuyele esikoleni kuthi nalabo abesebedikibele baqhubeke. Imfundo ayidingelwa ukwenza imali kuphela, iphinde imkhulise ngezindlela eziningi umuntu, isabalalise nomqondo.
Wenze umsebenzi omuhle Nomzamo, uqhubeke njalo ntombazane.