Ukunyuka kweVAT kuzothikameza abanezikweletu
EZABATHENGI
UHULUMENI unyuse intela ekhokhwa uma uthenga impahla iValue Added Tax (VAT) ngo1% yaba wu-15%. Ngizwile abantu bethi iphesenti elilodwa ngeke libahluphe ndawo kodwa-ke mina seliqalile ukungihlupha.
Yingakho ngithinte inhlangano esiza abacwile ezikweletini i-credit ombud ukuthola ukuthi abantu abanezikweletu bazothikamezeka kanjani ngokunyuka kweVAT.
UNkk Salem Nolubabalo Dya, obhekelele ezokuxhumana kwi-credit ombud, uthe ukunyuka kweVAT kuyinkinga kuwo wonke umuntu ngoba uma uboleke imali kusho ukuthi usuzokhokha imali ethe xaxa esikweletini sakho sanyanga zonke.
Uthe iphesenti elilodwa liyimali ngakho abantu kufanele bashintshe indlela abaphila ngayo ngoba sebezokhokha imali ethe xaxa.
“Abantu kufanele bazibuze ukuthi yiziphi izinto abangazidingi empilweni yabo bayeke ukuzithenga ngoba uma kuphela u-Ephreli sizowuzwa lo 1% okunyuswe ngawo iVAT. Ngicela abathengi bangazenzi ezinye izikweletu kodwa baqhubeke nokukhokhela lezo abanazo ukuze bangazitholi sebempintshekile,” kusho uNkk Dya.
Udonse ngendlebe abathengi ukuthi bangasizibi isikweletu kunalokho baxoxe nezinkampani abazikweletayo ukuze bakhokhe imali encane bakwazi ukuqhubeka nempilo.
“Kunomkhuba omubi owenziwa ngabantu bazitshele ukuthi ukungasikhokheli isikweletu kuzokwenza ukuthi obakweletayo baphelelwe ngamandla, usuke uzilimaza uma ungakhokhi ngoba ungcolisa igama lakho bese waziwa njengomuntu ongakhokhi,” kusho uNkk Dya.
Uthe asikho isidingo sokuthi umuntu aze acwile ngokudlulele ngoba izinkampani zifuna ukukhokhelwa noma ngabe ukhokha imali encane inqobo nje uma nyanga zonke ukhokha.
Uveze ukuthi abathengi abangaphezu kuka-10 million bayahluleka wukukhokhela izikweletu zabo.
Uthe labo abavele ngekhanda ezikweletini kufanele bafune usizo lwe-credit ombud kungaze konakale kakhulu.
I-credit ombud isizana mahhala uma unezinkinga zezikweletu zezitolo zezimpahla, imali ebolekisayo, ama-garnishee nokunye.
Itholakala ku-0861 66 2837 noma ngokuvakashela i-website www.creditombud. org.za kanti ungathumela i-email ku-ombud@ creditombud.org.za noma isms ku-44786 ucele ukuthi bakuthinte.
Asingene emibuzweni yabathengi:
Umbuzo: NginguZulu nginenkinga yegarnishee eseyidonse ngaphezu kuka-R4 000 emholweni wami, kuthiwa imali yesondlo. Idonswa ngabameli baseMpumalanga, angikaze ngihlale eMpumalanga angazi kungani kudonswa
imali yami. Impendulo: Kufanele utshele abaqashi ukuthi awulazi lelo garnishee bese ubhala incwadi efungelwe emaphoyiseni ukuze bayeke ukuthatha umholo wakho. Kungenzeka ukuthi basebenzise imininingwane yakho kamazisi kodwa ungayithinta ne-credit ombud ukuze ikulekelele.
Umbuzo wesibili: Ummeli akafuni ukukhokha imali yami yokulimala engozini sengimcebe kwiKZN Law Society. Igama ligodliwe
Impendulo: ILaw Society ithe udaba lwakho luphenywa yisigungu sayo esithumele imibuzo kummeli wakho. Uma ummeli esephendulile kuzohlala esinye isigungu esizonquma ngokufanele kwenzeke. UNkk N Harripersad, ophethe iLaw Society KwaZulu-Natal, uthe ucela uxhumane nehhovisi labo emasontweni amabili ezayo. Sizophinde sithinte oKlebe ukuzwa ukuthi ummeli ongakhokhi uvulelwa icala elinjani ngoba kuyicala ukugweva nemali yomuntu ekhokhwe yiRoad Accident Fund.
Umbuzo wesithathu: Ngidlelwe imali ebhange kodwa abasafuni ukuyikhokha. Igama ligodliwe
Impendulo: Uma ulahlekelwe yimali ebhange kufanele ubike khona bese bekunikeza inombolo yecala. Ubuze nokuthi kwenzekeni futhi kungani bengakwazi ukuyibuyisa imali yakho. Ngiphoxekile ukuthola ukuthi awunayo inombolo yecala futhi usalinde ukuthi ibhange libuyele kuwena. Uma udlelwe imali kufanele uzihluphe ngokuya ebhange ngoba uma ingekho inombolo yecala ibhange liyanqaba ukungisiza likhale ngokuthi aliyidaluli imininingwane yamakhasimende alo. Ngilincengile ibhange ukuthi likusize ngizokwazisa ngokuzayo ukuthi litheni.
Uma unenkinga edinga usizo lwezabathengi ungangithumelela i-email boniswa.mohale@inl.co.za