Iwuqale ngesasasa umjikelezo wayo iBlack Motion
INTANDOKAZI yeqembu lomculo, iBlack Motion, ithe ayinagqubu ngesehlakalo sokucwaswa kwayo yinkampani yamabhanoyi iBritish Airways esayehlela ngoDisemba nyakenye.
Lokhu ikuveze ngesikhathi inandisa e-Under The Moon eNanda, eThekwini, njengoba isemjikelezweni wokuhambela izifundazwe oxhaswe yiBallentine’s Scotch Whiskey.
Leli qembu linamalungu amabili, uBongani Mohosana noThabo Mabogwane.
UBongani uthe yize kuke kwavela ukuthi bafuna ukuhlawulwa ngo-R3.7 million kodwa lokho kukubameli babo.
“Akuyona into esemqondweni kithina leyo. Kwenzeka ngaleso sikhathi sadlula. Sabhala kuTwitter ngoba sifuna abantu bazi indlela esiphathwe ngayo kodwa sangayilandela kakhulu. Njengamanje lolo daba luphethwe abameli bethu futhi besingakababuzi ukuthi kuqhubekani,” kusho uBongani.
Akafunanga ukuphumela obala ngokuthi basazoqhubeka yini nokusebenzisa amabhanoyi eBritish Airways.
Umjikelezo wabo obizwa ngeMulti-City SA Music Tour, ubuqala e-Under The Moon ngoLwesihlanu. Usaya nakwamanye amadolobha amakhulu kuleli njengoba kuhlelwe ukuthi uphele ngenyanga ezayo.
UBongani uthe ukuxhaswa yiBallentine’s kubavulele amathuba amaningi ngisho naphesheya kwezilwandle.
“Siqale ukusebenzisana neBallentine’s ngasekuqaleni konyaka odlule. Abanikazi beBallentine’s yibona abeze kithina basitshela ukuthi indlela esiyiyona iyahambisana nesiqubulo sabo esithi: Stay True. Bathe nathi bayabona ukuthi sihlale sijabulisa abalandeli bethu ngendlela abayifunayo nokwenze kwaba lula ukuthi basebenzisane nathi,” kuqhuba uBongani.
Leli qembu linandise eNanda ngoLwesihlanu lashiya abantu besafuna impinda. Abanye besifazane bese bekhihla isililo bechazwa wukunandisa kwalo. Bese befisa ngisho nokungena esteji bange amalungu eqembu kodwa kwasho ukuthi bekubiyiwe bangakwazi ukufinyelela kuwona.