Ufuna usizo lomthetho mayelana ne‘Di Lille Clause’
IMEYA yaseWestern Cape, uNkk Patricia de Lille, ithi izofuna usizo lomthetho ngokuphasiswa komthetho omusha wokuhoxisa amalungu eDA ezikhundleni, i-recall clause, oteketiswa ngokuthi yiDe Lille Clause.
Umthetho uphasiswe ngoMgqibelo engqungqutheleni yeDA ebiseTshwane ngempelasonto.
Ngokwe-recall clause, amalungu eDA avumelene ngokuthi kuchitshiyelwe umthetho wokuhoxisa oMengameli, oNdunankulu, iziMeya nezinye izikhulu zeDA uma kuwukuthi abusathenjwa ubuholi babo.
USihlalo weFederal Council, uMnuz James Selfe, uthe umthetho wokuhoxisa abaholi uzoqala ukusebenza kuleli sonto, okusho ukuthi amalungu eqembu anganeme ngabaholi abathile angenza izincomo zokuthi bahoxiswe.
Esitatimendeni uNkk De Lille uthe umthetho wokuhoxisa abaholi ubhekiswe kuye ngoba vele kunabaholi be-DA abafuna ukumkhipha esikhundleni sakhe.
“Bazimisele ngempela ukungikhipha ngaphandle kokunginikeza ithuba lokuzivikela. Sebeze bashintsha umthetho wabo (ifederal constitution) ukuze ngihoxiswe. Ngizoyilwa le nto ngeke ngibabuke bedlala ngami.”
Uthe wayedlala abacindezeli ngesikhathi sobandlululo, ngeke ababuke badlale ngaye noma izwe selikhululekile.
“Ngalwa ngesikhathi sobandlululo ukuze abantu bathole ubulungiswa. Nami ngifuna ubulungiswa, kufanele nginikwe ithuba lokugeza igama lami. Lo mthetho uhlose ukungisusa ngaphandle kokuthi ngichaze noma nginekele izwe ngetulo lokungiketula,” kusho uNkk De Lille.