Imiphumela eyehlukene kweyeDiski Shield
BAQALE ngemiphumela eyehlukene abaqeqeshi bamaqembu afuna ukuvimba iLamontville Golden Arrows ukuthi iqophe omunye umlando ngokuba yiqembu lokuqala ukunqoba isicoco seMultichoice Diski Shield.
Ngemepelasonto iqalile ezinkundleni ezehlukene imidlalo yeDiski Shield kodwa abanye abaqeqeshi abafisa ukugudluza uVusi Vilakazi we-Arrows esicongweni baqale ngebatha.
Kule minyaka emithathu edlule uVilakazi uzidlela amahlanga; isicoco seMultichoice Diski Challenge usesidle kabili. I-Arrows esanda kubuya eSpain lapho ibivakashe khona emuva kokuhlabana kwayo ngesicoco seDiski iqale umqhudelwano ekuhambeni ibambane khona neChippa United ngo 0-0 eWolfson Stadium.
UDavid Notoane ophazamise uVilakazi kwesangonyaka odlule isicoco seDiski uqale ngomphumela oncomekayo enenebula iPolokwane City ngo 3-1 eTUT Stadium. UNotoane uthe iqembu analo ulibona likufanele ukunqoba isicoco somkhumulajezi.
“Okusiphazamisile wukuthi kunabadlali abebeyizinsika abanyuselwe esikimini esikhulu kwabakhona nabanye ababolekiswayo. Ngikholwa wukuthi iDiski Shield isinika ithuba elikahle lokuzihlola ukuthi sikuliphi izinga,” usho kanje.
UPhumlani Kubheka opheka i-Pirates emuva kokusula isigubhukane kukaReyaad Jacobs osesiza uBenni MaCarthy kuCape Town City, naye uqale ngesibhaxu eshaywa yiBidvest Wits ngo 1-0. UKubheka akabekelwe mgomo ngoba usemusha, usafunda ukuqeqesha. Ubepheka izikwati ezincane zePirates ngaphambi kokunikwa lesi sikhundla.
UDitheko Mototo wodumo kuKaizer Chiefs uyena opheka iBloemfontein Celtic eqale umqhudelwano ngewini evuthayo ishaya i-Ajax Cape Town ngo 3-1. Elinye iqembu elenze kahle emidlalweni yeligi yeDiski yiMaritzburg United, eshaywe womakhelwane AmaZulu FC ngo 3-1. U-Arthur Zwane kwiChiefs uqale kahle enqoba ngo 2-0 kwiPlatinum Stars.
Imiphumela yemidlalo yokuqala yeDiski Shield:
SuperSport United 0-0 Baroka FC; Chippa United 0-0 Lamontville Golden Arrows; Free State Stars 2-1 Cape Town City; Ajax Cape Town 1-3 Bloemfontein Celtic; Orlando Pirates 0-1 Bidvest Wits; Maritzburg United 1-3 AmaZulu; Mamelodi Sundowns 3-1 Polokwane City; Kaizer Chiefs 2-0 Platinum Stars.