Ithemba lokuqeda kwiTop 8 kuLarsen
AKALILAHLILE ithemba lokuqeda kwi-Top 8 umqeqeshi weLamontville Golden Arrows uClinton Larsen.
Abafana Bes’thende balahle amaphuzu amqoka ngempelasonto bedlala ngokulingana ngo 1-1 neFree State Stars emdlalweni we-Absa Premiership ePrincess Magogo Stadium, KwaMashu.
Igoli le-Arrows libaselwe enethini nguSiphelele Magubane kwathi eleStars kwaba ngumkhonto ogwaze ekhaya ngonyawo lukaNkanyiso Mngwengwe.
I-Arrows iyeke ithuba lokungena kwi-Top 8. IBidvest Wits ehlezi endaweni yesishiyagalombili ibingadlali ngempelasonto emidlalweni yeligi. Ibiyibambe kwiCaf Confederation Cup.
ULarsen exoxa nabezindaba ngemuva komdlalo ukubeke kwacaca ukuthi iqembu lakhe lisanethemba lokuqeda kwi-Top 8.
“Ngeneme ngendlela esidlale ngayo kodwa ngikholwa wukuthi iphuzu elilodwa lisho ukuthi silahlekelwe amabili. Into engijabulisayo wukuthi isonto nesonto abadlali bahlale belwela ibheji leqembu. Yilokho esikufuna kubona. Siyaqonda futhi ukuthi kukhona imidlalo esizoshaywa kuyona kodwa uma sishaywa silwile wonke umuntu ugcina ezigqaja ngathi,” kusho uLarsen.
I-Arrows isiqoqe amaphuzu angu-31 emidlalweni engu-26.
“Inhlanhla inqabile namuhla kodwa singakhela kule ndlela esidlale ngayo. Emidlalweni emihlanu eyedlule sithole imiphumela emihle. Abadlali babuyelwa yifomu okuyinto emnandi. Sisalelwe yimidlalo emine manje futhi ithemba lisalikhulu ngeTop 8. Ukuba siwinile ngabe sikwiTop 8. Sesibheke ukunqoba umdlalo olandelayo,” kusho uLarsen.
I-Arrows isizobhekana neMamelodi Sundowns ngoEphreli 17.
“Ngesiwombe sokuqala umdlalo besiwuphethe futhi kuyithina iqembu elingcono. Bekumele siye ekhefini sihamba phambili ngo 2-0. Sibafake ngaphansi kwengcindezi umdlalo uqala. Nangesiwombe sesibili senze njalo sathola igoli. Into engichaze kakhulu wukuthi siqhubekile salwa ngemuva kokuthi beshaye igoli lokulinganisa. Yinto esadida wonke umuntu ukuthi sihluleke kanjani ukuwina lo mdlalo. Senze konke ukuthola igoli. Unozinti wabo uvimbe amabhola ethu amabili abeyingozi,” kusho uLarsen.