Ufisa ukuqeqesha kwelikhulu uHeric
USAKHALELA ithuba lokuzinza kwiAbsa Premiership njengomqeqeshi uVladislav Heric osethathwa njengomsindisi wamaqembu asebheke ehlathini eNingizimu Afrika.
UHeric ubizwe kwiChippa United ukuthi ayoyitakula ibhedelwa yisimo emuva kokuthi ihlukane noTebogo Moloi. Lo mqeqeshi okunguyena onyusele iChippa kwiAbsa Premiership isuka kwiNational First Division (NFD) kumasizini adlule, ufike nezinguquko eziningi. Ngempelasonto uHeric uhole iChilli Boys yahlula iKaizer Chiefs ngo 3-0 emdlalweni wePremiership eFNB Stadium. Nakuba ekhonjwe indlela ngendlela engaqondakali ngesizini edlule kwiChippa kodwa uvumile ukubuya.
Emuva kweminyaka engu-15 eqeqesha eMzansi, uHeric uthe uyathemba ukuthi uzobhekwa ngamaqembu amakhulu ngelinye ilanga.
“Sengihlale iminyaka engu-15. Ngichithe isikhathi eside kwiNFD ngilinde ithuba lokuqeqesha esigabeni esikhulu kodwa angikaze nginikwe lona. Kuwona wonke amaqembu engisebenze kuwona ngisebenza sengathi ngiseqenjini elikhulu. Ngiyathemba ukuthi ngelinye ilanga ngiyothola umsebenzi ongifanele,” kusho uHeric. Emdlalweni wangoMgqibelo, uHeric ubophe iqhinga lamsebenzela. IChiefs ibiwuphethe umdlalo kodwa iChippa ibiba yingozi uma ithola ibhola, isibheke phambili. IChippa ingelinye lamaqembu aqale kahle isizini ka-2017/2018 kodwa yehlelwa yifomu. Isingelinye lamaqembu aselwela ukubalekela izembe.
“IChiefs ithole amathuba amabili okushaya amagoli kuqala kunathi. Kuze kwaba ilahlekelwa ngumdlali okuyilapho singene khona ngenxeba. Nangesikhathi sesihamba phambili ngo 2-0 iChiefs iqhubekile yaba yingozi, ikhombisa ukuthi ingathola igoli. Bekuwumdlalo onzima Ngiyaziqhenya ngabadlali abagcine indlela ebesihlele ukudlala ngayo,” kusho uHeric.
“Kubalulekile ukugcina abadlali bezithobile emuva kwalo mphumela kodwa kuzoba nzima. Inselelo esibhekene nayo wukunyuka kwi-log, singene kwi-Top 8.”