Baqoqa izindondo abakuleli abasimele kwese-Australia
ININGIZIMU Afrika ibe nempelasonto enhle kumaCommonwealth Games aseAustralia iqoqa izindondo. UChad Le Clos uthathe ezimbili enqoba ku-50m butterfly awulandelise ngegolide lika200m butterfly. Izolo uthole isiliva ku-100m freestyle. Lo mbhukudi usenezindondo ezingu-15 aziwole kumaCommonwealth Games.
UTatjana Schoenmaker ube owokuqala wesifazane ukuthola indondo yokubhukuda kusukela ngo-2010 eNew Delhi. Unqobe ku-200m breastroke. UCameron van der Burg uthole ithusi ku-100m breastroke kwathi uMona Pretorius wangeza emgodleni wakuleli ngethusi kwi-weightlifting. UHenrie Schoeman nguyena owavula ngegolide enqoba i-triathlon.
Kuleli sonto amehlo azothi njo kubasubathi u-Akani Simbine noHenrico Bruntjies abazibekisele indawo kowamanqamu ka-100m namuhla ngo-2.15 ntambama. UCaster Semenya uzoqala umkhankaso wakhe wezindondo uma eseyibamba ku-1500m naku-800m. ULebogang Shange obeyibambe ku-20km Walk izolo ekuseni uthole indawo yesishiyagalolunye kwathi uWayne Snyman wathola indawo ka-14.
Khonamanjalo umgijimi wakuleli oza kabi, uSokwakhana Zazini, ushiye izihlwele zisafuna impinda ngesikhathi enqoba igolide ku-400m kusongwa i-ASA U/18 and U/20 Youth Championship, ePaarl, eWestern Cape ngempelasonto.
UZazini ongumpetha womhlaba ku-U/18 ku-400mH, uziqophele isikhathi esisha esisheshayo egqashula intambo ngo-45:86. Bekungokokuqala egijima isikhathi esingaphansi kuka-46:00 kuleli banga.
Uthathe leli golide nje, ulibelethisa alithole ku-400mH, wona awunqobe ngo-49:98.
“Bengisebenza kanzima ukuze ngishaye isikhathi esingaphansi kuka-46. Ekugcineni kwenzekile ngakho ngijabule kakhulu,” kusho uZazini esitatimendeni se-Athletics South Africa.
Uthe yize esenqobe isicoco somhlaba eKenya nyakenye kodwa ujabule ngokudla umhlanganiso ekhaya.
“Ngilapha ngincintisana nontanga yami phambi kwabantu engibaziyo nabangithandayo. Lokhu kusho lukhulu kimina.”
Omunye umdlali osemncane owenze kahle uKayle Blignaut oshaye irekhodi lakuleli lika-20.85m kwi-shot put.