ILions ikhiqize unyazi kuMadosh Tambwe
IKUPHINDILE futhi lokho i-Emirates Airlines Lions ikhiqiza olunye unyazi lomdlali okusobala ukuthi uma luqhubeka ngendlela oluziveze ngayo luzobonakala kumaBhokobhoko ngokushesha. Unyazi lwasophondweni uMadosh Tambwe ushaye ama-try amane kwadideka wonke umuntu obesenkundleni okuhlanganisa nabadlali beDHL Stormers ngenxa yokushesha kwakhe uma ephethe ibhola.
UTambwe (20), okhombise ukuba namandla nekhono, uzalelwe eDemocratic Republic of Congo (DRC).
Akuwona umkhuba ongaziwa kuleli ukuthi uma umdlali ekhombisa ikhono akhushulwe yize engeyena owomsinsi wokuzimilela eNingizimu Afrika njengoTendai “Beast” Mtawarira noTim Agaba bobabili abazalelwe eZimbabwe naseUganda ngokulandelana kodwa bangabadlali abanezinkontileka neSouth African Rugby Union (Saru) ngokugcwele. ILions ikhiqiza uTambwe kanti ezinyangeni ezedlule iveze olunye ubisi lomdlali, u-Aphiwe Dyantyi (naye obheke kumaBhokobhoko uma ezoqhubeka nendlela aziveze ngayo).
Kulo mdlalo iLions ibhubhudle izimbangi zayo ezinkulu iStormers ngo 52-31 koweVodacom Super Rugby. Lokhu kubuyisele iLions esicongweni ku-log uma isihlanganisiwe. NgoLwesihlanu, iCell C Sharks kusale kancane iqophe umlando ngokushayela ekhaya iHurricanes. EzikaRobert du Preez osekunomfutho nakubalandeli bazo uma bekhuluma ngazo zishaye iHurricanes esike yasidla lesi sicoco ngo 38-37.
Okukhulisa ukuzethemba kuDu Preez nabalandeli bakhe wukuthi iSharks ikhombisa izimpawu zokubuyelwa wumqondo nje, isidlalile namaqembu anzima obekumele ibhekane nawo ekuhambeni. Manje isivulekelwe yithuba elihle lokuqala iqoqe amaphuzu ngendlela ethanda ngayo kwazise isizodlalela ekhaya. Umdlalo olandelayo weSharks oweVodacom Bulls ngoMgqibelo. Nakuba iBulls iqale kabi futhi idonsa kanzima kuze kube yimanje, iSharks akumele iyibukele phansi ngoba imidlalo yabakhaya kuSuper Rugby iyamangaza.
“Okunzima sesikwenzile. Sikhombisa izimpawu zokubuyelwa yifomu ngesikhathi esikahle. Ngaphandle kokuya e-Argentina yonke imidlalo esele sizoyidlalela ekhaya. Uma singekho eThekwini sizokuba seKapa nasePitoli ngakhoke ithuba lokuvala ngamandla likhona,” kusho uDu Preez. Imiphumela yeVodacom Super Rugby: Jaguares 14-40 Crusaders; Lions 52-31 Stormers; Brumbies 45-21 Reds; Chiefs 21-19 Blues ; Sunwolves 29-50 Waratahs; Hurricanes 38-37 Sharks.