I-Sundowns ithwese ijoka iPirates
IMAMELODI Sundowns ithwese ijoka i-Orlando Pirates ngombango wesicoco se-Absa Premiership ngokuqoqa amaphuzu amathathu ibhekene neBaroka FC emdlalweni weligi ePeter Mokaba Stadium, eLimpipo, izolo ntambama.
Amagoli eSundowns ashaywe nguWayne Arendse esiwombei sokuqala, uPercy Tau walishaya kwesesibili. EleBaroka lishaywe nguLucky Nguzana esiwombeni sokuqala libeka iqembu lasekhaya phambili nokuphoqe ukuthi iSundowns ibhukule ukuze ilinganise.
Ngokuwina iSundowns ivule igebe lamaphuzu amane phakathi kwayo nePirates osekuyilona iqembu elibukeka lifuna ukuyiphazamisa. ISundowns, ebikade isele ngomdlalo, sekudingeka iwine umdlalo owodwa ngokwezibalo ukuze ikhiphe iKaizer Chiefs, esendaweni yesithathu, embangweni weligi. Amakhosi azenzele phansi ehlulwa yiChippa United ngo 3-0 ngoMgqibelo eFNB Stadium. Lokhu kusho ukuthi umbango usuzosala phakathi kwePirates neSundowns emidlalweni yeligi eyisihlanu yokuvala isizini ka-2017/2018.
IPirates izothola ithuba lokwehlisa igebe libe yiphuzu uma isibhekene neSuperSport United eMbombela Stadium ngoLwesithathu.
Umqeqeshi weSundowns uPitso Mosimane usevele ukuvumile ukuthi iPirates izoba yingozi embangweni wesicoco njengoba ingabavumeli ukuthi bavule igebe lamaphuzu ngendlela abafuna ngayo. UMosimane ubekade efuna ukuhlukaniswa ngamaphuzu ayisikhombisa neqembu elibalandelayo uma sekufika imidlalo yokugcina.
Emdlalweni wayizolo, iSundowns iqale ilincenga ibhola ibukeka ingajahile kwazise iBaroka ibikade ihlezi emuva ilinde ukuyizuma. Emuva kwemizuzu eyisikhombisa onozinti bamaqembu womabili kade sebeke bewenza umsebenzi. Nokho onzima ubhekane noweSundowns, uDennis Onyango, echilizela ngaphandle ishodi likaMduduzi Mdantsane. Emuva kokuhlasela iphindelela, iBaroka igcine ilitholile igoli ngesikhathi uNguzana eqobela phakathi ibhola ebelikade ligotshwe uRobin Ngalande kwesokunxele emva kokudlala ikhona emfishane ngomzuzu ka-21. Leli goli libukeke liyivusa emaqandeni iSundowns, yakhuthala ukubheka phambili kunakuqala kodwa yahluleka ukusebezisa amathuba Ngomzuzu ka-44, u-Arendse ungqofele phakathi ibhola ebelikade ligotshwe nguTau kwesokudla emuva kokudlala ikhona emfishane.
Esiwombeni sesibili, iSundowns iqhubekile nokuhlasela. Ngomzuzu ka-51 uTau uqedele ibhola likaSibusiso Vilakazi aligobe kwesokudla. Emuva kwaleli goli iBaroka ibukeke isiphelelwa wumfutho ebikade inawo esiwombeni sesibili kwazise iSundowns ibikade isicanasa kubhoke kakhulu uTau, Vilakazi noKhama Billiat.
Imiphumela ye-Absa Premiership:
Bloem Celtic 1-1 AmaZulu; Baroka 1-2 Mamelodi Sundowns; Maritzburg United 1-1 Cape Town City; Platinum Stars 2-0 Polokwane City; Kaizer Chiefs 0-3 Chippa United; Golden Arrows 1-1 Free State Stars.