Amehlo athe njo kuCaster Semenya
KULINDELEKE ukuthi ayivale ngenothi eliphezulu imidlalo yamaCommonwealth Games umgijimi uCaster Semenya. Namuhla uzogijima owamanqamu ka-800m kule midlalo esongwa ngeSonto eseGold Coast, e-Australia.
USemenya usevele uvalele igolide emgodleni wakhe alithathe ku-1 500m. Manje usebheke indondo yesibili emidlalweni abeqala ukudlala kuyo.
Izolo unqobe kalula kowokuhlunga okuholele ukuthi ancintisane nezimbangi zakhe zeminyaka uMargaret Wambui waseKenya noWinnie Nanyando wase-Uganda abashiya sengathi bamile enqoba igolide ebangeni elifanayo kwi-IAAF World Championship nyakenye.
Uma uSemenya enqoba uzonyusa isibalo samagolide esesitholwe ithimba laseNingizimu Afrika lifinyelele ku-12.
Izolo abagijimi abangaboni kahle, uHilton Langenhoven Ndodomzi Ntutu bathole izindondo. UNtutu uthate igolide enqoba ku-100m kwathi uLangenhoven wangena endaweni yesibili. UWenda Nel ubuye nethusi engena endaweni yesithathu kowamanqamu ka-400mH. Emjahweni ka-200m kube nebohlololo uClarence Munyai eqeda endaweni yesihlanu kowamanqamu.
Akuzange kuyihambele kahle iNingizimu Afrika kuleli banga njengoba no-Anaso Jobodwana ehoxisiwe ngemuva kokusuka kuqala kowandulela owamanqamu. Kwale noma esencengelwa kwanhlanga zimuka nomoya.
“Ngidonseke umsipha kowandulela owamanqamu, kubuhlungu manje. Labaya bebeshesha kakhulu. Ngijabule nje ukuthi ngifinyelele kowamanqamu ngibe ngiqala ukugijima emqhudelwaneni omkhulu,” kusho uMunyai.
Kushone elayizolo iNingizimu Afrika ihleli endaweni yesihlanu ohlwini lwezindondo isiqoqe eziwu-32. Elinye ithuba lokwandisa isibalo liseqenjini leSevens Rugby elingompetha bango-2014 neqembu le-4x100m relay.