‘Asiphulanga mthetho ngoNdoro’
UMQEQESHI we-Ajax Cape Town, uMuhsin Ertugral, usamile ekutheni akukho okuphambene nomthetho abakwenzile ngokudlalisa umgadli uTendai Ndoro, nosekubeke leli qembu engcupheni yokuphucwa amaphuzu.
Kulindeleke ukuthi kuleli sonto iPremier Soccer League (PSL) inqume ngodaba lukaNdoro emuva kokuthi inhlangano eyengamele ibhola emhlabeni, iFifa, inqume ukuthi iNingizimu Afrika ayizilungisele yona lolu daba. Kuthiwa iPSL isicele ukuthi iFifa iphinde ilubhekisise udaba lukaNdoro. I-Ajax isolwa ngokuphula umthetho weFifa ngokudlalisa uNdoro, oyijoyine ngoJanuwari.
Ngokomthetho wale nhlangano, umdlali akavumelekile ukudlalela amaqembu amathathu ngesizini eyodwa. UNdoro udlale kwi-Orlando Pirates nakwiAl Faisaly yaseSuadi Arabia ngaphambi kokujoyina i-Ajax. Isigungu esiqondisa ubugwegwe kwiPSL, iDispute Resolution Chamber (DRC), sanquma ukuthi uNdoro aqhubeke nokudlala nokuholele ekutheni amaqembu afake izimangalo. I-PSL yaphinda yaphikisana nesinqumo seDRC nokuholele ekutheni udaba lugcine selufakwa kwiFifa. Kulindelwe ukuthi indaba kaNdoro ibekwe eqhulwini emhlanganweni wesigungu esiphezulu sePSL ngoLwesine.
U-Ertugral uthe akaboni bezophucwa amaphuzu. I-Ajax ingene engcupheni yokudlala ama-play off emuva kokwehlulwa yiMamelodi Sundowns ngo 3-1 eLucas Moripe Stadium ngoMgqibelo ntambama.
“Uma unezincwadi zokushayela imoto, unemvume yokushayela. Uma kungenjalo iDRC eyani. Uma iDRC ikunika izincwadi zokushayela kusho ukuthi kufanele ushayele. Kuze kube manje lokhu kuyasilimaza ngoba ungumdlali osezingeni eliphezulu. Amanye amathuba aphunyuka uYannick (Zakri), uNdoro ubengawaqedela,” kusho u-Ertugral.
“Asikho embangweni neSundowns kodwa namanye amaqembu, okusho ukuthi ubengasishayela amagoli okuwina mhlawumbe sibhekene neGolden Arrows noma elinye iqembu. Ngicabanga ukuthi okwenzekayo kuyinto ezobhekwa kakhulu. Ekugcineni sikhulume ngamasizini ashayisana neyePremiership nokuthi iFifa yenqabile, yabuyisela eNingizimu Afrika lolu daba. Ngingasho ukuthi ngeke kuthinteke amaphuzu.”
I-Ajax isendaweni ka-15 kwi-log ngamaphuzu angu-31. Kufanele nakanjani iwine umdlalo wokugcina wesizini ukuze isinde ekudlaleni ama-Play Off namaqembu amabili agijima kwiNational First Division (NFD). Izokwamukela iKaizer Chiefs eCape Town Stadium ngoMeyi 12 ngo-3 ntambama.
“Sikude nendaba yama-play off. Ngisho ukudlala ngokulingana lapha bekuzowenza umehluko. Uma siwina ekhaya siphephile. Sehlule amaqembu amaningi anzima ekhaya kule sizini okukhona kuwona nePirates ngo 3-0,” kusho u-Ertugral.