Uzofihlwa ngoMgqibelo u-Akhumzi
UZOFIHLWA ngoMgqibelo, emathuneni aseWest Park, eGoli, usaziwayo wakuleli u-Akhumzi Jezile (29), oshone engozini yemoto ngoMgqibelo, e-Eastern Cape.
Lezi zindaba zivezwe okhulumela umndeni ka-Akhumzi, uPercy Vilakazi.
UPercy uthe, yize kusenzima emndenini ka-Akhumzi ikakhulukazi kumama wakhe kodwa imiyalezo alokhu eyitholile eqhamuka kubantu bakuleli isho lukhulu kuyena.
“Namhlanje (ngoLwesithathu) kuzoba nenkonzo yokumkhumbula ehlelwe inkampani abesebenza kuyo i-Urban Brew ezoba ekhethekile ezokwenzelwa u-Akhumzi noSkhumbuzo naye owashona kule ngozi. Le nkonzo kuzobe kungeyona ekanoma ubani kodwa eyalabo abakade besebenza nalaba kuphela,” kusho uPercy.
Uthe ngoLwesine kuzobe sekubanjwa eka-Akhumzi evulelekile kuwona wonke umuntu ezoba sebandleni, iRhema Bible Church, khona eGoli nezoqala ngehora lesibili ntambama.
“Umgcwabo kaSiyasanga sesitholile ukuthi uzoba ngempelasonto ezayo. Kodwa enkonzweni yesikhumbuzo ka-Akhumzi kuzoba nesikhathi la kuzokhunjulwa khona uSiyasanga,” kuchaza yena.
Uthe inkonzo yongcwabo ka-Akhumzi izophinde ibanjelwe khona eRhema kusuka ngo-9 ekuseni.
“Besingakabi nalo ulwazi ukuthi laba abanye bangcwatshwa nini futhi kuphi. Kodwa uma sithola emindenini yabo, solokhu sinazisile,” kuchaza yena.
U-Akhumzi wazakhela udumo ohlelweni lwezingane iYOTV futhi obesengumdidiyeli wohlelo lomculo kuSABC1, iLive Amp.
Kule ngozi kudlule nentokazi uSiyasanga Kobese owaduma ecula eqenjini iJoyous Celebration, nobesengumlingisi emidlalweni okukhona kuyo iZabalaza, Greed and Desire neThe River.
Omunye owabashona uThobani Mselemu naye obengumlingisi noSkhumbuzo Mbuthuma obesebenza e-Urban Brew.
UPercy ekhuluma esiteshini sezindaba sakwa-e.tv, i-eNCA wathi imoto eyayihamba o-Akhumzi yashaywa isigadla semoto eyayiphambi kwabo esaphuma ihamba.
Uthe laba ngesikhathi beshaywa ilesi sigadla imoto yaphaphalaza emgwaqweni yagingqika.
Okhulumela amaphoyisa ase-Eastern Cape, uCaptain Namhla Mdleneni uthe, namanje akukaboshwa muntu amaphoyisa asaqhubeka nophenyo.
Uthe bonke ababandakanyeka engozini sebehlonziwe imindeni yabo.