Ingane idubule enye zidlala ngesibhamu
IBHEKENE necala lokuzama ukubulala ingane eneminyaka eyisikhombisa edubule enye yakwamakhelwane eneminyaka engu-11, zibanga isibhamu sikamkhulu wayo, ngoLwesine endaweni yaKwaMaviyo, eManguzi.
Lesi sigameko, esishiye umkhulu wale ngane esangene, senzeke kulo muzi izingane zisele zodwa zidlala egcekeni.
Umkhulu wale ngane uthi namanje usathukile njengoba ebengacabangi ukuthi umzukulu wakhe usengenza into efana nalena.
Umkhulu, ongeke adalulwe ukuze kuvikelwe ingane, ongumnikazi wesibhamu, uthi ufike ekhaya izingane sezidubulene njengoba yena ebengekho zisele zodwa.
“Isibhamu esami sihlala ekhabetheni engifihla kulo izinto ezibalulekile futhi kuyakhiywa. Umzukulu lo ngihlala ngimkhiphela imali yokuthi aphathe esikoleni bese uma esehambile ngisifihle isikhiye. Usuku nosuku ngihlala ngihamba naye uma ngiyovula,” kusho umkhulu.
Uthe kuyacaca ukuthi umzukulu wakhe wake wabona lapho ebeka khona ukhiye njengoba ekwazile ukuwuthola wavula ikhabethe.
“Uma esho uthi ngesikhathi bedlala bakhulume ngezibhamu abahlala bezibona kuthelevishini kulawa mafilimu abahlale bewabuka. Bathi laba abanye umzukulu ube esesho ukuthi mina nginesibhamu base bemyalela ukuthi akahambe ayosilanda la sihlala khona ukuze basibone,” kuchaza yena.
Uthe ngesikhathi ebuya naso lona odubulekile kuvela ukuthi ubesesithatha efuna ukusiphatha yena.
“Umzukulu kuthiwa ubengafuni ukumnikeza sona. Ngesikhathi besibanga kula kuvele ukuthi siqhumile kwase kudubuleka lona omdala. Siyabonga ukuthi akonakalanga kakhulu kodwa okwenzekile kusethusile impela,” kuchaza yena.
Uthe lo odubulekile uyelulama esibhedlela njengoba eshayeke ngasekhwapheni.
Okhulumela amaphoyisa KwaZulu-Natal, uLt Colonel Thulani Zwane, usiqinisekisile lesi sigameko wathi akukaboshwa muntu.
“Kuphenywa icala lokuzama ukubulala,” kusho uZwane.