Intukuthelo bengaholi othisha bakwaGrade R
ZIYAVEVA izinyunyana zothisha KwaZuluNatal ngokungaholelwa kothisha bakwaGrade R umholo wangenyanga edlule.
Izinyunyana zizwakalise ukushaqeka ngokungakhokhelwa kwalabo thisha ekubeni bezihlangene nomnyango ngeledlule.
INatu ithi izobhikisha ngaphandle kwesiShayamthetho saKwaZulu-Natal, eMgungundlovu, kusasa uma uNgqongqoshe wezeMfundo uMnuz Mthandeni Dlungwane esethula isabelo sezimali salo nyaka.
ISadtu yona ithi ukungakhokhelwa kwabasebenzi yizinkomba zokuthi umnyango uyawa.
UNksz Nomarashiya Caluza, uNobhala weSadtu, uthe umnyango utshengisa umphakathi ukuthi awubakhathelele abasebenzi bawo ikakhulu othisha bakwaGrade R.
Uthe umnyango usuphake impi ngokubukela phansi othisha bakwaGrade R.
“Awuyiphakile impi kulabo thisha kuphela kodwa kubona bonke abasebenzi. Ngeke umnyango ugxeke izikole ngoba siyazi othishanhloko bahambisa zonke izimfanelo ngesikhathi. Siqinisa umkhankaso wethu ngoba sike sakhuluma nabo ngoba sifuna ukuthi bakhokhelwe ngokushesha. Sifuna bakhokhelwe ungakashayi uLwesine,” kusho uNksz Caluza.
UMnuz Allen Thompson, iPhini likaMengameli weNatu, uthe uDlungwane wabethembisa ngeledlule ukuthi uyazilungisa zonke izinkinga zamaholo namabhonasi alabo thisha.
Uthe babalelwa ku-6 000 othisha abathintekayo wathi bazoyivikela imfundo esifundazweni ngoba kuyacaca ukuthi kukhona abayihlaselayo.
“Sinxusa umphakathi nabazali ukuthi beseke labo thisha bengabukelwa phansi nguDlungwane nezikhulu zomnyango. Sizobhikisha uma sekwethulwa isabelo sezimali sezemfundo” kuchaza uThompson.
Unxuse labo thisha ukuba bangalahli ithemba.
Uqhube wathi basaqhubeka nokuhlaba ikhwelo lokuthi uMnyango wezeMfundo kulesi sifundazwe ufakwe ngaphansi kokulawulwa nguhulumeni kazwelonke njengoba kwenzekile eNorth West.
“Uma bengaholi othisha bakwaGrade R, sibona ingozi yokuthi ngomuso bonke othisha ngeke bahole. Abaholi abakhona emnyangweni sebehlulekile futhi baphambana nokushiwo nguhulumeni ukuthi imfundo iseqhulwini lwezinto ezihamba phambili kuleli,” kubeka uThompson.
Okhulumela uDlungwane, uMnuz Kwazi Mthethwa, uthe bayalulungisa udaba lo thisha bakwaGrade R wathi badlala iqhaza elibalulekile ezikoleni.
Kwenzeka lokhu nje umnyango ubusakweleta labo thisha uchatha okwakumele uwufake ngoDisemba nyakenye.
Izinyunyana bezisalwela ukuthi labo thisha benyuselwe le mali, okumanje bebelokhu bethenjiswa ukuthi izonyuswa kodwa inganyuswa, njengoba begcine bengasaholi nhlobo.
UDlungwane wazisholo yena ukuthi uyayilungisa indaba kachatha wathi bangabantu ababaluleke kakhulu kwezemfundo.