Hlangana mihlathi eyazanayo kuKhongolose: Mabuza
IPHINI likaMengameli wezwe uMnuz David Mabuza linxuse ukuba iphele indaba yezinhlangothi kwi-ANC, kubunjwane.
Ubekhuluma emgubhweni woSuku lwabaSebenzi enkundleni yezemidlalo eCurries Fountein eThekwini izolo. “Siye engqungqutheleni yaseNasrec eGoli kukhona oNDZ noCR 17, manje ingqungquthela isidlulile kumele iphele indaba yoNDZ noCR 17,” kusho uMabuza.
Uqhube wathi: “Ngiyawanxusa wonke amaqabane, okubalwa nawalapha KwaZulu-Natal ukuthi awakwamukele ukuthi sekukhona umengameli omusha odinga ukuhlonishwa.” Uthe ukuba khona kwezinhlangothi kuzokwenza umfelandawonye ube buthaka.
Uncome nemizamo eyenziwa wuhlaka lwesikhashana oluhola i-ANC KwaZulu-Natal, iProvincial Task Team yokuzama ukubumba inhlangano.
“Siyazazi izikhalo ezikhona lapha KwaZulu-Natal zokukhishwa kobulungu benhlangano nezinye.
Ubuholi bukazwelonke benza konke okusemandleni ukuzixazulula,” kusho uMabuza.
“Njengoba sihlangene lapha kukhona abanye abasebenzi abahlangene kwenye indawo kodwa ningabasebenzi nonke,” kusho uMabuza.
Unxuse abasebenzi ukuba baqhubeke nokuseka uKhongolose njalo uma kunezinketho.
“Abasebenzi babambe iqhaza elikhulu empumelelweni ye-ANC njengoba kube khona abaholi okubalwa kubo uMnuz Sihle Zikalala noMnuz Willies Mchunu abahhahhameziwe ngesikhathi kubizwa amagama abo.
Kube nenhlokomo kubizwa igama likasihlalo weSACP KwaZulu-Natal uMnuz James Nxumalo okhale ngendaba yokuncishwa kwabantu ubulungu be-ANC.
UNxumalo uphakamise ukuthi kubuyekezwa indaba yokwenyuswa kweVAT. Uthe ukudla nophethroli kwenyukile ngenxa yokwenyuka kwayo.