Isezitokisini inyanga okuthiwa yadlwengula
IGQUNYWE esitokisini inyanga yaseWeenen eboshwe ngoba isolwa ngokudlwengula owesifazane ebimelapha.
Inyanga (49) kuthiwa iboshwe isaqhubeka nomsebenzi wayo kwayo ngeSonto. Isolwa ngokudlwengula owesifazane (26) waseMtshezi obezolashelwa ukugula ngoLwesithathu olwedlule.
ULieutenant-Colonel Thulani Zwane, okhulumela amaphoyisa KwaZulu-Natal, uthe inyanga isagqunywe esitokini. Kulindekele ukuthi ivele enkantolo maduze. Ukuqinisekisile ukuthi isolwa ngokudlwengula owesifazane obelashwa.
Isoka lowesifazane okuthiwa udlwenguliwe, elithukuthele ngokwenzekile, lithe likujabulele ukuthi inyanga iboshiwe. “Kungcono uma kukhona okwenzekayo ngoba bengingakhululekile neze ingakaboshwa. Ngitshelwe ngamaphoyisa ukuthi inyanga iboshwe kwayo ngeSonto. Nami ngisalinde ukuzwa ukuthi izovela nini enkantolo,” kusho isoka.
Lithe isimo sengoduso yakhe kasisihle selokhu kwenzeka lokhu. Ikhala ngezinhlungu esinyeni nasebuntwini bayo. Lithe udokotela uyilayele ukuthi ibuyela esibhedlela eMnambithi namuhla.
Isiguli size siyolashwa enyangeni nje yingoba sasikade siphume esibhedlela ngoMsombuluko odlule. Kuthiwa umndeni wakhe wabona singabi ngcono wabona kungcono sibonane nomelaphi wesintu.
Kuthiwa bekungokwesithathu eya enyangeni ebinconywa ngokwelapha. Waphelezelwa ngubabekazi wakhe. Inyanga yafike yamnikeza imithi yabuye yamchatha. Yabuye yayalela ubabekazi ukuthi alinde ngaphandle ngesikhathi yona iyothandazela isiguli sodwa egunjini elingaphandle komuzi. Kuthiwa ngesikhathi isiguli sithandazelwa saphelelwa ngamandla sawa. Inyanga kuthiwa yasidlwengula ithandaza phezu kwaso.
UMnuz Sazi Mhlongo, iPhini likaSihlalo weCouncil for Traditional Healers’ Profession, uthe kabahambisani nokudlwengulwa kwabesifazane egameni lokwelapha.