Abasebenzi mababumbane: Ramaphosa
UMENGAMELI Cyril Ramaphosa uthi umzabalazo wokwenyuswa kweholo elingu-R20 ngehora kumele uqhubeke ngoba akulona iholo eliphilisayo kodwa kuseyisekelo njengoba ibingekho imali ebekiwe kulabo abahola kancane.
URamaphosa, obekhuluma emgubheni wabasebenzi ezinkundleni zemidlalo i-Isaac Wolfson eNelson Mandela Bay, e-Eastern Cape, izolo, uthe lo-R20 ngehora abasebenzi kumele baqhubeke balwe ukuze wenyuke.
“U-R20 yisisekelo. Yinto ebingekho ezoqala maduzane ukuze abasebenzi bazuze ngaphansi kwayo.
“Kubasebenzi abangu-16 million kuleli, u-6.6 million wabo ubuhola ngaphansi kuka-R20 ngehora noma u-R3 000 ngenyanga. Siyavumelana nalabo abathi bekumele iholo libe phezulu, abanye bathi bekumele liqale ku-R15 000 ngenyanga, kodwa baningi abantu abebezolahlekelwa umsebenzi. Amafemu abezovalwa abantu balambe, akuyona into esiyifunayo leyo,” kusho uRamaphosa.
Uthe babalelwa ku-8 million abantu abangalahlekelwa ngumsebenzi uma ngase bahole imali enkulu ngenyanga.
Uqhube wathi iCosatu yaya kwiANC ikhala ngokuthi alikho iholo elibekiwe kulabo abahola kancane, okungabasebenzi basezindlini, abasemapulazini nakweminye imikhakha.
“Indaba yeholo eliphilisayo yinto esemqulwini wentando yeningi. Sibe sesivuka emaqandeni sayilungisa indaba yaleli holo. YiCosatu esukumile yalwa ukuze kube khona eyaleli holo.”
UMengameli weCosatu, uMnuz S’dumo Dlamini, uthe indaba yeholo eliphilisayo ibalulekile kubantu abangu-6 million abahola kancane.
Uthe iCosatu ikhona ayifile njengoba kukhona abacabanga ukuthi ayisekho indaba yayo.
“Amamashi abe yimpumelelo, abantu baphume ngobuningi babo. Sisamile ekutheni kuqedwe nya ngama-labour brokers. Siyazi ikhona imigomo ethinta indaba yama-labour brokers kodwa ayisebenzi yingakho sifuna aqedwe.”
Uthe bayahambisana nesinqumo samagantsha e-ANC sokuba kubuyiswe umhlaba ngaphandle kwesinxephezelo.
“Aseneme ngokuthi awukaze uhlale umhlangano wombimbi. Sifuna uhole lolu hlelo Mengameli sihlangane ukuze kwakhiwe ubumbano. Ngifuna ukuxwayisa i-DA eNelson Mandela Bay, izinsuku zayo zibaliwe kulo mkhandlu, siyeza ngo-2019”.
Ziningi izinhlangano, okubalwa nomfelandawonye wezinyunyana iSaftu, ezikhala ngokuthi mncane kakhulu u-R20 ngehora ozoholwa abasebenzi abavele kuyimanje bahola kancane.URamaphosa uthe kubalulekile ukuthi abasebenzi babumbane.
“Kubalulekile ukuthi abasebenzi bakhulume ngazwi linye kube nomfelandawonye owodwa. Lokhu kuzokwenza ukuthi kungabi nesimo lapho izinyunyana zimashelana zodwa noma zikhulumana kabi,” kusho uRamaphosa.
UNobhala jikelele weSACP, uDkt Blade Nzimande, uthe bayayichitha eyokwenyuswa kweVAT ibe ngu15%.
“Sukumani basebenzi nilwe nokwebiwa kwezwe lethu,” kusho uNzimande.