Ubefisa ukufihlwa eduze noyise uPhakathi
UBENESIFISO sokufihlwa noyise emathuneni aseLamontville, uBheka Phakathi. UPhakathi (43) udlule emhlabeni engozini yemoto ngeSonto entathakusa eGreytown. Ushiye izingane ezine nomkakhe u-Amanda Phakathi.
UPhakathi owazakhela udumo ngebhola ayelidlala egijima kwiLamontville Golden Arrows nakwiOrlando Pirates ubesecija uMvoti FC odlala kwi-ABC Motsepe League KwaZuluNatal.
UMato Madlala ongusihlalo we-Arrows nebamba lesikhulu sePremier Soccer League (PSL) utshele leli phephandaba ukuthi uPhakathi wazisholo yena ukuthi ufuna ukungcwatshwa eduze kukayise eLamontville.
“UBheka umnumzane wekhaya lakhe. Ngakho kunoma ngubani ofisa ukubamba iqhaza uzolawulwa ngumndeni. Kuzoya ngokuthi izifiso zomndeni noBheka zimi kanjani. Sizozwa ngomkakhe ukuthi yini ayifisayo. Unkosikazi ngihlezi naye usadideke ikhanda. Izingane zakhe zisencane. Into kaBheka iwumqansa. Okwamanje unkosikazi kaBheka ucabanga iSonto (ukuthi afihlwe ngalo) kodwa bebengakazi ukuthi kuzoba wusuku olukahle yini kubantu abazokhalisa uBheka,” kusho uMato.
Kuvele ukuthi uPhakathi ubekhonza kwaShembe. “Umndeni ubufisa yonke into yenzelwe lapha ekhaya. Okwamanje akukacaci kodwa kuyisifiso ukuthi afihlwe ngeSonto. Mayelana nendawo yenkonzo yomngcwabo sizozwa ekuhambeni kwesonto. Mina nje uRocky wakithi wayethe ufisa ukufihlwa la eLamont. Yingakho ngithi sizolandela umndeni. Uma ngizwa naye isifiso sakhe bekuwukuthi afihlwe khona la eLamont. Uyise wafihlwa la, ngakho naye ufuna ukufihlwa noyise,” kusho uMato.
UPhakathi wake wayibamba nakwiMaritzburg United ngaphambi kokuthi athathe umhlalaphansi.
“UBheka waba nenhlanhla yokuthi uma ekhetha unkosikazi akhethe umuntu onezinto ezehlukile naye. Unonkosikazi omsize isikhathi esiningi babambisana baba nale nto abanayo. Okuningi akuzuzile ukuzuze ngenxa yokubambisana nonkosikazi wakhe. Ubethi uma efuna into alwele ukuyithola. Esadlala ukwazile ukulondoloza waphinde wahlelela impilo ngemuva kokudlala ibhola,” kuphetha uMato.
UNgqongqoshe wezeMidlalo nokuNgcebeleka KwaZuluNatal uNkk Bongi Sithole-Moloi uvakashele umndeni kaPhakathi ngoMsombuluko ukuyobhonga emswaneni.