UMato utusa iqhaza likaBheka
WABAMBA elikhulu iqhaza ukuze kusungulwe iLamontville Golden Arrows uBheka Phakathi, odlule emhlabeni engozini yemoto ngempelasonto.
Lezi zindaba zivele ngesikhathi Isolezwe lixoxa noMato Madlala (osesithombeni) ongusihlalo we-Arrows nophinde abe yibamba lesikhulu esiphezulu kwiPremier Soccer League (PSL).
UPhakathi (43) uzakhele igama kuBafana Bes’thende ngokudlala ibhola elinenkosi phakathi.
“Igalelo likaBheka liqale kusungulwa (kabusha) i-Arrows. Ungomunye wabadlali abaya kuRocky (Madlala owayengusihlalo we-Arrows) bathi akaqambe iqembu ngeLamontville. Yibona ababebelesele uRocky yaze yaba khona le-Arrows. Yaqala iyiNtokozo FC yaze yaba yi-Arrows. Ukube uBheka wayengekho angikholwa ukuthi ngabe ikhona i-Arrows,” kusho uMato exoxa naleli phephandaba emzini kaBheka eLamontville. Ubengomunye wabebeyoduduza umndeni ngoMsombuluko.
UPhakathi ushone esecija uMvoti FC ogijima ku-ABC Motsepe League.
Leli qembu liqede endaweni yokuqala KwaZulu-Natal, okusho ukuthi lizomela isifundazwe emidlalweni yokuhlungela iNational First Division (NFD).
Amanye amaqembu adlale kuwona uPhakathi, kukhona i-Orlando Pirates neMaritzburg United. Ube ngumsizi womqeqeshi kwiArrows inyukela esigabeni esikhulu ngo-2015 nakwiRoyal Eagles.
“Ngingamangala uma ngingezwa kuthiwa kukhona umuntu owazi unxa kaBheka. Ubengeyena umuntu wodlame. Ubencamela ukubuyela eceleni kunokuthi kuphikiswane ngamazwi. Ngisho manje esemdala bekuthi uma ngimdinelwe avele abaleke. Akekho umuntu obengeke amangale uma ezwa indaba kaBheka ngoba ubesamncane. Ubehlale engumuntu ofuna ukuzuza izinto ezinkulu,” kusho uMato.