Bazovela enkantolo abangu-56
BAZOVELA enkantolo yemantshi yendawo abantu abangu-56 baseMooi River abasolwa ngokudala udlame oluholele ekutheni kushiswe amaloli angu-32, emgwaqweni onguthelawayeka, uN3 , ngeSonto. Laba basolwa ababhekene namacala okususa uthuthuva emphakathini nokutholakala nempahla entshontshiwe kulindeleke ukuthi bavele enkantolo namhlanje.
Okhulumela amaphoyisa kulesi sifundazwe, uLt Colonel Thulani Zwane, uthe abasolwa baneminyaka ephakathi kuka-17 no-46 baboshelwe ukutholakala nezimpahla ezehlukene ezebiwe emalolini ashisiwe. Phakathi kwazo kubalwa inyama, amaburger, ama-tissue, ama-toilet paper nama-tiles.
Umphakathi wakule ndawo kuthiwa uvuke umbhejazane ngeSonto ebusuku ubhikishela ukuthi abaqashi abangabanikazi bamaloli, baqasha abashayeli bamazwe angaphandle kwakuleli.
Umbhikisho wabo uqale ngokuthi umphakathi ujikijele izinto ezithile emalolini ashayelwa ngabashayeli okungebona abakuleli abedlula kulo mgwaqo. Kuphethe ngokuthi ababhikishi bawokhele ngomlilo amaloli, amanye acekelwe phansi. Ngesikhathi kwenzeka lokhu abanye bathole ithuba lokuzitapela kulawa maloli abesecekelwe phansi.
Kudaleke isiminyaminya, okuholele ekutheni izimoto zingakwazi ukudlula kulo mgwaqo ohlale umatatasa kusukela ngesonto ebusuku kuze kube uMsombuluko.
UNgqongqoshe wezokuThutha KwaZulu-Natal, uMnuz Mxolisi Kaunda uvakashele kule ndawo ngoMsombuluko. Uthe uhulumeni uyakuqonda ukuthi kule ndawo kwahamba izimboni eziningi okwakusebenza kuwo abantu bakule ndawo, okuholele ekutheni iningi labantu lingasebenzi. Uthe zikhona izinhlelo ezenziwa uhulumeni wesifundazwe zokubuyisela ezinye zalezi zimboni.
UNksz Zinhle Mngomezulu weRoad Traffic Directorate, izolo uthe abasebenzi beminyango eyehlukene baqalile ukukhuculula izinsalela zamaloli ashisiwe nezinye izinto ebeziphonswe ngababhikishi emgwaqweni. Umgwaqo uvulwe ngoMsombuluko.
Ngempelasonto yePhasika abasebenzisa lo mgwaqo babhekana nesimo esifanayo ngesikhathi kunabantu ebebezitapela izimpahla emalolini, eshaywa nangamatshe.
UKhomishana wamaphoyisa osabambile KwaZulu-Natal, uMajor General Bheki Langa, uthe ngeke bakubekezelele ukuthi abantu uma benezikhalo ngezinto ezithile bavale umgwaqo bacekele phansi nempahla.
“Abenza lokhu bazobhekana nengalo yomthetho. Umuntu ovimba umgwaqo omkhulu njengalo uzophathwa ngendlela efanayo nezinye izigebengu, ngeke sikubheke ukuthi ubekwenza lokhu ngoba enezikhalo ngokuthile. Ziningi izindlela ezibekiwe zokukhalaza uma kukhona ukungeneliseki, ukwenza ubugebengu akuyona ingxenye yakho,” kusho yena.