Bakhuzela ababizwa ngabathakathi
INHLANGANO ebhekele abadala, iThe Association for the Aged (Tafta) idonse ngendlebe umphakathi ukuthi uyeke umqondo wokuthi abadala bayathakatha uma belahlekelwa wumqondo.
UDkt Rayne Stroebel oyisazi sesifo somqondo esivamise ukuhlasela abadala i-dementia, uthe kubalulekile ukuthi umphakathi usiqonde kangcono lesi sifo ngoba abadala bayahlukunyezwa uma sesibahlasele.
“Umuntu omdala uye alahleke azithole esekwenye indawo kodwa ebe ehlose ukuya kwakhe. Omunye usuke engasakhumbuli nokuthi uwubani ngenxa yokuthi i-dementia ihlasela umqondo. Akufanele babizwe ngabathakathi nangamanye amagama ayiziswana kodwa badinga ukuthandwa,” kusho uDkt Stroebel.
Uthe iTafta izoba nezinkundla zokucobelelana ngolwazi ezifanele abahlala nabadala, abasemkhakheni wezempilo nomphakathi wonkana othanda abadala.
Lezi zinkundla zokucobelelana ngolwazi zizoba se-Anna Conradie Service Centre, eThekwini ngoMeyi 23.
Ukungena kunguR150 umuntu emunye.
Esitatimendeni esithunyelwe abakwaTafta kwabezindaba, bathe uDkt Stroebel uneziqu zeMasters kwiDementia Studies, azithole eNyuvesi yaseStirling eScotland futhi unguMqondisi wenkampani iGeratec egxile ekusizeni abantu abaphila ne-dementia.
“Enkundleni yokucobelelana ngolwazi sizokhumbuza abantu ukuthi i-dementia iyisifo esithinta umqondo kodwa esidinga ukuthi simnakekele onaso. Isikhathi esiningi abantu abane-dementia abahlukunyezwa yiyona kodwa kuba yithina esibaphatha kabi. Sifuna abantu bakwazi ukuphatha kahle abantu abane-dementia,” kusho uDkt Stroebel.
Embikweni we-Alzheimers SA wango-2013 kuvela ukuthi bangu-44.4 million abantu abaphila ne-dementia emhlabeni jikelele. ENingizimu Afrika bangu-2.2 million abakhathazwa yilesi sifo.
UNkk Femada Shamam oyisikhulu esiphezulu seTafta uthe bafuna ukuthi abasebenzi bezempilo nemindeni yabaphila ne-dementia babe nezinsiza ezifanele zokusiza abathandiweyo babo. “Umuntu one-dementia udinga ukukhunjuzwa ukuthi uwubani nokuphathwa kahle angalokhu ethethiswa uma kukhona akukhohliwe noma enza okuthile. Kubalulekile ukuthi sithande abantu, singabehluleli ngoba umqondo wabo usuke uphazamisekile,” kusho uNkk Shamam.