AbaseBonela bakhala ngabemijondolo
SEKUQUBUKE uvalo kubanye babahlali baseBonela abasola abantu abahlala emjondolo ngokudla izindawo zabo.
Laba bahlali, abakhulume neSolezwe, baveze ukuthi besatshiswe ngabanye abahlali basemijondolo yaseNkanini ukuthi bazobashisela izindlu zabo uma bebalwisa ngokuthi bakha imijondolo emagcekeni abo.
Omunye umhlali waseBonela, ongathandanga ukudalulwa ngenxa yokwesabela impilo yakhe neyomndeni wakhe, uthe indlu yakhe yake yashiswa ngebhomu likaphethroli kubangwa yona indaba yomhlaba.
Elandisa ngesigameko sakamuva, uthe ngoMsombuluko ebusuku kungene indoda enomjondolo eNkanini egcekeni lakhe yagxumeka omunye umjondolo.
“Ngibone abantu bakha umjondolo egcekeni lami ngabe sengiyabakhuza bavele bavukwa ulaka, omunye wangisongela ngokuthi uzoshisa indlu yami,” kuchaza lesi sakhamuzi.
Uqhube wathi akanankinga nokuthi abantu bayakha ngoba uyazi ukuthi isimo somnotho asikho esimeni esikahle kepha ufisa ukuthi kube khona umngcele ohlukanisa bona nabahlali baseNkanini ngoba akazi ukuthi kumele bakhe bagcine kuphi ngoba babuye bafike bezokwakha nasemagcekeni abo.
Omunye umhlali waseBonela, naye ongathandanga ukudalulwa igama, ukhale ngokuthi umuzi wakhe awusadiyiseki ngenxa yale mijondolo egcwele eduze kwawo.
“Sengineminyaka emibili ngizama ukudayisa lo muzi kepha awudayiseki, ngike ngizibuze nokuthi amanzi nogesi bakuthola kephi laba bantu, ngoba njalo ngesonto ngikhipha uR250 ngogesi,” kusho lo mhlali.
Okhulumela inhlangano yaBahlali baseMjondolo, uMnuz Thapelo Mohape, uthe banezingxongxo eziqhubekayo nabahlali kepha uthe uyaqala ukuzwa ngendaba yokuthi abahlali baseNkanini basongela abahlali baseBonela .
“Sisaqhubeka nezingxongxo nabahlali njengoba kusho umyalelo wenkantolo owathi kuvumeleke ukuthi kube nemijondolo engu-35 kuphela eNkanini kodwa manje seyidlulile naku-100. Isimo siyazama ukusiqapha. Indaba yokuhlaselwa nokwethuswa kwabantu baseBonela ngiyaqala ukuzwa ngayo kodwa sizophenya ngayo,” kusho uMohape.
Ikhansela lendawo, uMnuz Warren Burn, lithe sekuphele unyaka bebhekene nale nkinga yemijondolo kodwa kuncane abangakwenza ngayo.
“Kuncane nami engingakwenza ngoba laba bantu banodlame, akukho lula ukukhuluma nabo,” kusho uBurn.
Uphethe ngokuthi usaqhubeka nokuzama ukukhuluma nomphakathi ngendaba yomngcele ohlukanisa abahlali baseBonela nabaseNkanini.