UMkhwebane uchitha izinsolo zeCasac
IHHOVISI loMvikeli woMphakathi, u-Adv Busisiwe Mkhwebane lizwakalise ukukhathazeka kwalo ngezinsolo zokuthi ufihla imininingwane ebalulekile ngombiko wepulazi laseFree State, i-Estina.
UMnuz Lawson Naidoo weCouncil for the Advancement of South African Constitutuion (Casac) uthe u-Adv Mkhwebane kufanele athweswe icala ngokungawudedeli wonke umbiko othinta i-Estina.
UNaidoo uthe ukufihla imininingwane kuyicala elibomvu futhi kusho ukuthi u-Adv Mkhwebane akasebenzi ngokuzimela.
Emaphepheni afakwe yiCasac enkantolo ngoLwesithathu ithe ifuna u-Adv Mkhwebane ahlawule ngokungathembeki kuMthethosisekelo.
“Udaba siluhambise enkantolo ngoba asifuni kube nabantu abangajezi ngokumosha imali eyayihlelelwe abalimi abasafufusa eFree State. Sithole ukuthi kunemininingwane egodliwe embikweni okhishwe u-Adv Mkhwebane ngoFebhuwari 8 nonyaka. Embikweni owawenziwe u-Adv Thuli Madonsela wayethe isikhulu ebesiphethe ezezimali uMnuz Peter Thabethe wayengayiphethe kahle imali kodwa koka-Adv Mkhwebane akubhalwanga gama lamuntu kunalokho kuthiwe uNdunankulu waseFree State kufanele ajezise izikhulu ezithintekayo,” kusho uNaidoo.
Uthe u-Adv Mkhwebane akasiphikisanga isicelo sabo enkantolo okusho ukuthi uyazi kunemininingwane ayigodlile.
Uphinde waveza ukuthi u-Adv Mkhwebane ukhala ngokungabibikho kwemali eyanele yokuthi enze uphenyo olunzulu ngezindaba eziyiswa ehhovisi lakhe.
UMnuz Oupa Segalwe wehhovisi loMvikeli woMphakathi uthe u-Adv Mkhwebane uyazichitha lezi zinsolo zokuthi ugodle imininingwane ethile ngoba efuna ukuvikela osopolitiki.
“UMvikeli woMphakathi wenza umsebenzi wakhe ngokulandela umthetho, akusilo iqiniso ukuthi uvikela osopolitiki. Uyazichitha lezi zinsolo zeCasac ngodaba lwase-Estina,” kusho uSegalwe.