Kumi ngomumo kwi-Africa’s Travel Indaba
KUMI ngomumo ngamalungiselelo ombukiso omkhulukazi wezokuvakasha i-Africa’s Travel Indaba ozoba seNkosi Albert Luthuli International Convention Centre, eThekwini, ngeSonto.
Isikhulu esiphezulu seSouth African Tourism, uMnuz Sisa Ntshona, sithe ezokuvakasha, ezikhula ngo-8% njalo ngonyaka, zidala amathuba omsebenzi amaningi.
Sigqugquzele abatshalizimali ukuthi bafake imali yabo ezweni ngoba umnotho uyakhula futhi ezokuvakasha zihamba kahle kakhulu.
Ngokombiko weStats SA, zingaphezu kuka-3.5 million abavakashi abangena ezweni ngonyaka odlule.
UNtshona uthe amalungiselelo e-Africa’s Travel Indaba ahamba kahle kangangokuthi sebelinde ukwamukela izivakashi nabazokhangisa ngemikhiqizo yabo.
Ubalule ukuthi kuzokhangisa izinkampani ezingaphezu kuka-27 bese kuza abathengi abangaphezu kuka-100 baseNorth America.
NgoMsombuluko kulindeleke ukuthi abahambele i-Africa’s Travel Indaba bahlangane okokuqala sebehwebelana kwazise ngeSonto bazobhalisa bese behambela nemicimbi ehlukene.
UNtshona uthe banezinhlelo zokwandisa ngo-5 million abavakashi abeza eNingizimu Afrika neziya kwamanye amazwe ase-Afrika.
NgoLwesibili abahambele i-Africa’s Travel Indaba bazophinde bathole ithuba lokukhumbula owayengumengameli waseNingizimu Afrika ongasekho, uMnuz Nelson Mandela. Kuzobe kukhona nabeNelson Mandela Foundation. Kulo nyaka kugujwa iminyaka ewu100 kwazalwa uMandela.
Kuzophinde kube khona abezokuvakasha abavela emazweni ase-Afrika, izinkampani zase-Europe nabantu abanamabhizinisi ahlukene emalokishini nasemakhaya.
Abanye balabo bantu basizwa yiTourism KwaZulu-Natal kanti abanye basizwa yiSA Tourism.