Akuqhanyukwe nesisombululo senkinga yezingozi
ZIBHUBHISILE izingozi zomgwaqo kule mpelasonto ebinamaholidi amaningi. Kubantu ababhubhile kubalwa nosaziwayo ababe sezingozini ezehlukene, phakathi kwabo umethuli nomdidiyeli wezinhlelo zethelevishini u-Akhumzi Jezile nomqeqeshi webhola waseThekwini uBheka Phakathi wodumo kwiLamontville Golden Arrows ne-Orlando Pirates. Sibe sikhulu isililo ngokudlula emhlabeni kwalabo saziwayo ikusasa labo ebelibukeka liqhakazile ngenxa yamagalelo abo ezindimeni abakuzo.
Zikhona nezinye izingozi okubhujiwe kuzona futhi zikhona nezenzeke ngaphambi nangemuva kwalezi ezibe ngundabuzekwayo. Kugqamile ukuthi inkinga inkulu emigwaqweni eNingizimu Afrika futhi ikabili. Inkinga yokuqala ngeyesimo semigwaqo, eminye eba magedugedu aze abe maningi amathuba okwenza ingozi noma ukulimala kwemoto. Inkinga yesibili ithinta isimo somshayeli nemoto yakhe, okuthi uma kokubili lokhu kungekho esimeni kube namathuba okuthi kube nengozi yomgwaqo.
Siphelile manje isikhathi sokulokhu kubaliswa kukhalwa ngokwanda kwezingozi, ikakhulukazi ngezikhathi zamaholidi noma ngempelasonto elulwa amaholidi.
UNgqongqoshe wezokuThutha kuzwelonke uDkt Blade Nzimande nethimba lakhe longoti bamelwe wukuthi baqhamuke nezisombululo zale ngwadla eqhubekayo nokubhuqabhuqa abantu kuleli.
Akwenele kodwa ukushaya nokuqinisa umthetho emgwaqweni uma abashayeli bengezokuyihlonipha imithetho yomgwaqo.
Siphonsela inselelo abashayeli ukuba ike ishintshe indlela yokuziphatha emgwaqweni.
Makungabi lula ukungena esiteringini ube wazi kahle ukuthi ubukhile, kuyingozi ukushayela kwakho.
Makungagadwa ukuthi amaphoyisa omgwaqo akanise ngakuphi ngenhloso yokupulukutshela lapho engekho khona.
Ubudedengu bokushayela ngesivinini esiphezulu nokuhamba ngemoto engekho esimeni esikahle, kulele kubashayeli ukuthi bakuyeke.
Uma abashayeli bengayihloniphi imithetho yomgwaqo nayo imithetho yomgwaqo ingaqini, izingozi zomgwaqo zizoqhubeka nokubhubhisa isiphuce abathandiweyo bethu.