Umculi usethi khumu emculweni nasemicimbini
UMREPHA uRiky Rick usememezele ukuthi usethi khumu emculweni nasekuhambeleni imicimbi amenywa kuyo ngenxa yokungaphili kahle emoyeni.
Lezi zindaba uzimemezele enkundleni yokuxhumama uTwitter, ngeSonto ebusuku.
URiky uthe, kunzima njengoba kuzomele athathe isikhathi angabonakali kubantu abahlale belindele ukuthi uzobajabulisa njalo ngoba ephilile.
“Kunzima ukuba wusaziwayo futhi kunzima nokutshela abantu ukuthi awuphilile.
Angiyena umuntu ophila ngemilingo ngiwumuntu ofana nawo wonke umuntu ofuna ukuthola ukuthula nokujabula empilweni. Ngiyaxolisa,” kubhala uRiky.
Uthe uyaxolisa kubantu abazophatheka kabi ngokuthatha lesi sinqumo kodwa akekho esimeni esikahle sempilo.
“Ngeke ngikwazi ukuqhubeka nokuhambela imicimbi nanoma yini ezongenza ngishiye umndeni wami. Ngithatha lesi sikhathi ukuze ngithole nokholo lwami ngaphambi kokuthi ngilahlekelwe ngabantu engibathandayo,” kuchaza yena.
URiky akacacisanga ukuthi uzobuya nini emculweni kodwa ubhale ukuthi uyobuya uma kwenzeka.
Izindaba zishiye abantu benemibuzo ehlukene abanye wbesho ukuthi bazomkhumbula.
URiky uzakhele udumo ngezingoma eziningi, okukhona kuzo ethi, Boss Zonke, Sidlukotini, Stay Shinning nezinye.
Imizamo yokuthola uRiky Rick ayiphumelelanga, ucingo lwakhe belukhala lungabanjwa.