OwoZalo nesifiso sokuhambela izindawo
UMLINGISI woZalo, uNay Maps, ophume endaweni yesibili emncintiswaneni, iTropica Island of Treasure, uthe ukubheke ngabomvu ukuhambela izindawo ezahlukene.
Lolu hlelo obeluqoshelwa esiqhingini, iMaldives luphele ngoMsombuluko kuSABC 3.
Kunqobe i #TeamRed ebunjwe ngumculi we-Afrikaans uBrendan Peyper noLisanne Lazarus abahlomule ngoR1 million.
UNay Maps, odlala indawo kaMxolisi kuZalo, ubesethimbeni noRudi Witkowsky beyi #TeamYellow).
“Ngibheke ukuhambela kakhulu izindawo, nokugqugquzela abantu ngezinkulumo ezakhayo, ngiphinde ngibazise ngengqephu nokulingisa kanjalo nangomculo.
“Ngizokhipha ingoma yami yokuqala ngasekupheleni konyaka, ngakho abantu abalindele,” kusho uNay Maps esitatimendeni.
Uthe ufuna nokusebenza emidlalweni emikhulu kuthelevishini, emafilimini akuleli nawaseHollywood.
Uthe kusukela umncintiswano uqala wayezimisele ngokufika kowamanqamu adlalele uR1 million.
Uthe ukujabulele ukuchitha isikhathi eMaldives ngoba kade kwasa efuna ukuya khona.
“Ngikujabulele nokuhlangana nabantu abamangalisayo nokuchitha isikhathi nabo. Bekumnandi. Ngikuthandile nokuhleka nokufunda kabanzi ngami nangempilo. Kukho konke ngiyajabula ngobungani engibakhe nozakwethu uRudi,” kusho uNay Maps.
Lolu hlelo beluphethwe ngumethuli we-Expresso uKatlego Maboe. Osaziwayo abebengenele bekungoKhanya Mkangisa, Sbahle Mpisane, Karabo Mogane, Tumi Voster noMelinda Bam.