Akakholwanga etshelwa ukuthi uzokwethula uhlelo
INTOKAZI yaseManzimtoti uZola Nene ithi ukuba umethuli wezinhlelo zethelevishini kwakungekho ezinhlelweni zayo ikhula kodwa ukuba umbhali wezincwadi zokupheka ikhona okwakuhamba phambili.
Le ntokazi esizinze eGeorge, eWestern Cape ingelinye lamajaji ohlelweni lwemishado iThe Wedding Bashers.
NgeSonto kuDStv M-Net (101) ngo 6 ntambama, kuqale lolu hlelo lwemishado ngegiya eliphezulu.
Osaziwayo abane abangamajaji babonakala behambela imishado ehlukene babheke ukuthi konke kuhamba ngendlela yini.
Babheka ukudla, imfashini, ubumnandi obuhlelelwe izihambeli nendlela okuhlotshiswe ngayo.
UDenise Zimba, Zavion Kotze, Bernelee Daniell noZola yibona abazobonakala kulo.
Ekhuluma neSolezwe, uZola uthe ukujabulele ukuba yingxenye yalo futhi uzimisele ukufunda okukhulu kulo.
“Uhlelo lwami lwesibili lolu ukulwethula futhi angisabheki emuva. Sekuyiminyaka manje ngikuthelevishini kodwa ngingekho phambi kwababukeli. Omunye wophrojusa esasisebenza naye wanginxusa ukuthi ngizame ukuba umethuli wenzinhlelo nangempela ngaqala ngohlelo lokubhaka iThe Great South African Bake Off,” kusho uZola.
Uthe ngesikhathi ethola ucingo lokuba omunye wabethuli be-The Wedding Bashers, wayecabanga ukuthi kukhona odlala ngaye.
“Ngiyawuthanda umshado futhi nembalwa esesiyihambile, ngivele ngazizwa ngisekhaya. Siyathemba ababukeli balolu hlelo bazolujabulela futhi basithande ngendlela esizobe senza ngayo emishadweni ehlukene,” kuchaza yena.
Kulo nyaka uZola uthe uma kuqhamuka amathuba okwethula izinhlelo ngeke awayeke.
“Ngizokhipha incwadi yami yesibili yokupheka nengifisa sengathi ingenza kahle njengeyokuqala engathola ngayo izindondo phesheya kwezilwandle,” kuchaza yena.
Abashadikazi abazowina kulo nyaka bazohamba nemiklomelo yonke ebiza uR800 000.