Ocula ikwaito uhlele umcimbi kamaskandi
IZINDUNA zabalandeli babaculi bakamaskandi zasogwini oluseningizimu, zithi ncinci kaMjoli njengoba sekuzoba nomcimbi omkhulu kamaskandi ePort Shepstone. Umcimbi ohlelwayo yi-Esayidi Maskandi Festival ezoba soGu Sports & Leisure Centre ngoSepthemba 22.
Uhlelwa wumculi wekwaito uProfessor ongumnikazi wenkampani iProper Files.
NgoMsombuluko uProfessor kade ehlangene nezinduna enkundleni okuzosingathwa kuyo umcimbi beyokhuluma ngamalungiselelo awo.
Induna yabalandeli bakaMthandeni “Igcokama Elisha” Manqele egatsheni elisePort Shepstone, uZwe Magubane, ithe ijabule ngokuthi sebezoba nowabo umcimbi ngoba kade behambela ezinye izindawo.
“Ngikhuluma nje kade sigcwalise i-Ellis Park ngesikhathi uMthandeni ethula iCD yakhe entsha yeNdlabeyiphika. Sinabo nathi abaculi ngapha kodwa umcimbi omkhulu besingenawo,” kusho yena.
“Sizoyenza ibe bomvu (umbala ogqokwa abalandeli beGcokama) le nkundla. Wonke amagatsha abalandeli aseKZN nawaseGoli azobe ekhona emcimbini.”
Izinduna ziphonsele inselelo abahleli ukuthi benze isiqiniseko sokuthi ezokuphepha ziqinile ukuze lungabi khona udweshu futhi utshwala bungavunyelwa.
Zithembise ukuthi zizonxenxa abalandeli ukuthi baphume ngobuningi babo ukuze umcimbi udlondlobale, ube minyaka yonke.
UProfessor, ongowokuzalwa eZinqoleni, uthe kuyiphupho lakhe ukuthi abantu baziqhenye ngemvelaphi yabo.
Uthe abaculi abazoshiyelana inkundla kubalwa uMthandeni, Shwi noMtekhala, Qhoshangokwenzakwakhe, Phuzekhemisi, Osaziwayo, Ichwane Lebhaca, Mbuzeni, Ithwasa Lekhansela, Thokozani Langa, Inyon’ Emhlophe, Imbongolo, uyena uProfessor, Character, Malini, Avante nabanye abaningi.
Amathikithi azoqala ukutholakala eComputicket maduze ngoR100 kanti nasesangweni azobe ekhona. Umcimbi uzoqala ngo-9 ekuseni.