Nezingane sezisika kwelijikayo esifweni
UYANDA umkhuba wokukhulumisa izingane emngcwabeni, okuyinto ebingajwayelekile kwabamnyama. Izingane ezineminyaka emihlanu nangaphansi sezinikezwa ithuba lokukhuluma ngoshonile phambi kwezihlwele. Isabalele ezinkundleni zokuxhumana inkulumo yokuvalelisa yabazukulwana bakaNkk Winnie Madikizela-Mandela abebembiza ngoBig Mommy, abayenze enkonzweni yokumkhumbula, e-Orlando Stadium eSoweto. Bekugcwele izikhulu namalungu omphakathi. Abazukulwana okubalwa uZazi, Bhambatha, Ziyanda noZwelami bakhulume bededelana besho indlela abebemthanda ngayo umufi. Inkulumo yabo inanelwe ihlombe abanye bekhombisa ukudabuka.
Enkonzweni yokukhumbula uDkt Zola Skweyiya oke waba ngungqongqoshe kuleli nakhona banikezwe ithuba lokukhuluma abazukulu bakhe. Yize abadala bekhulume okunomqondo, omunye wafunda inkondlo, kukhulume nobonakala eneminyaka engaphansi kwemihlanu. Lo mzukulu kudingeke afukulwe engafiki ngisho embhombhweni. Akuzwakalanga akushilo ngaphandle kokuxolisa ezihlweleni ukuthi zihlangene ngokushona kukamufi.
UNkk Nokulunga Goba osanda kungcwaba unina, uthe emndenini abahambisani nokukhulumisa izingane emngcwabeni. Kunalokho uthe ziyacula noma zibhale inkondlo efundwa ngabadala.
“Ukufa kunzima ngisho kubantu abadala, enganeni kuzwela kakhulu. Kusuke kunzima nokuchazela ingane ngesifo, okungenzi umqondo uma inikezwa ithuba emngcwabeni,” kuchaza uNkk Goba.
Yagcina iyihlaya ezinkundleni zokuxhumana indodana yomculi uRobbie Malinga, ikhuluma emngcwabeni wakhe. Abanye bebehlekisa ngayo bethi ithole ithuba lokuzikhangisa ngoba yezwakala ibingelela nabangani ezihlweleni.
UMnuz Madoda Zungu oyisazi samasiko, uthe kuyichilo ukuthi izingane zikhulume emngcwabeni ngoba akumele ngisho zisondele esidunjini.
“Izingane bezifihlwa uma kukhona isidumbu, zifihlelwe nokuthi kushoniwe. Lokhu bekwenzelwa ukugwema ukudideka enganeni ngoba ukufa kungaphezu kwayo. Izingane zamanje azisenandaba nesidumbu ngoba ziyasikhonjiswa, zikhulunyiswe nasemngcwabeni. Ezinye sezikwazi nokubulala ngoba azisesabi isidumbu,” kusho uZungu.
Uthe kuyisiko lenhlonipho kwabamnyama ukuthi ingane ingakhulumi phambi kwabantu abadala, okuyichilo kakhulu uma ikhuluma emngcwabeni.