‘Ngadalwa ngaba nje futhi ngiyazemukela’
KUNGENZEKA ukuthi uCaster Semenya ubephendula i-International Association of Athletics Federations (IAAF) ngombhalo awufake ekhasini lakhe le-twitter izolo ekuseni.
Sekuphele cishe isonto igama likaSemenya lindiza emoyeni ngemuva kokuthi i-IAAF ikhiphe isitatimende iqinisekisa ukuthi isivumelene ngomthetho wokuthi abesifazane imizimba yabo ekhiqiza i-testosterone ngokwedlulele, kunalokhu okulindelekile kwabesifazane, bengabe besagijima ku-400m, 800m naku-1500m.
Okufaka uSemenya kulo mthetho, okuthiwa uzoqala ukusebenza ngoNovemba 1, wukuthi lawa ngamabanga ayibamba kuwona. Usanda kubuya negolide ku-800m naku-1500m kuma-Commonwealth Games abese-Australia ngenyanga edlule.
Umthetho we-IAAF uthi uSemenya nabanye abagijimi abasesimeni esifuze esakhe kuzomele badle imishanguzo ezodambisa ukukhiqizeka kwe-testostetone emizimbeni yabo uma bezimisele ngokuqhubeka kula mabanga. Uma bengazimisele ngokudla amaphilisi kuzomele banyukele ku-5000m kuya phezulu.
“UNkulunkulu ongidale ngale ndlela futhi ngiyazemukela njengoba nginjalo. Ngiyilokhu engiyikho futhi ngiyaziqhenya ngami,” lona ngumbhalo ofakwe uSemenya ekhasini lakhe lakwi-twitter izolo ekuseni.
Ngempelasonto edlule Semenya ubeyibambe kwi-USSA Student Championship lapho edle ubhedu ku-400m.
Ekhuluma kuthelevishini uveze ukuthi leli banga linyindlela lokuzicijela iWorld Cup eseLondon ngoJulayi.
“Ngakha ijubane njengoba ngigijima u-400m. Nizobona umphumela wakho ngokuhamba kwesikhathi,” kusho uSemenya kuSABC.
Omunye umqhudelwano uSemenya asengakwazi ukugijima kuwo ngaphambi kukaNovemba yi-IAAF Diamond League. Umlenze wayo wokuqala useDoha, eQatar, ngoLwesihlanu. USemenya lapha ungenele u-1500m.
Lo mpetha womhlaba, odabuka eLimpopo, uthola ukwesekwa njengoba kusolwa i-IAAF ngokucwasa. Nangaphakathi kule nhlangano bakhona abangahambisani nalo mthetho.
Usolwazi wezomthetho wakuleli, uSteve Cornelius, usulile emkhandlwini wokuqondisa izigwegwe we-IAAF.
Uthe unembeza wakhe awuhambisani nalesi sinqumo esithathiwe.
“Angiziboni ngiqhubeka ngiba yingxenye yohlelo lapho ngizophoqeleka ukuthi ngisebenzise imithatho engikholelwa wukuthi ayinabo ubulungiswa futhi emaningi amathuba okuthi kwamanye amazwe ayivumelekile. Ngalezi zizathu ngiyasula,” kusho uCornelius esitatimendeni asikhiphe ngoMsombuluko.